Qaıtys bolǵan 1 donordyń aǵzalary bes adamǵa sátti transplanttaldy
ASTANA. KAZINFORM - University Medical Center klınıkalarynda donorlyq aǵzany transplanttaý boıynsha ota sátti júrgizildi. Osylaısha dárigerler donor kezeginde turǵan bes adamnyń ómirin saqtap qaldy, dep habarlaıdy QR DSM baspasóz qyzmeti.
Donor ınsýlt alǵan 44 jastaǵy áıel boldy, dárigerler konsılıýmy marqumnyń mıy qyzmetin toqtatqanyn (ólgenin) rastady. Onyń týystary aǵza donorlyǵyna kelisim berdi.
UMC júrek ortalyǵynda medıtsınalyq top 43 jastaǵy patsıentke júrekti transplanttady. Naýqasqa buryn mehanıkalyq qan aınalymyn qoldaý qurylǵysy (LVAD) ımplanttalǵan, sonyń arqasynda ómir súrip kelgen.
Ekinshi patsıentke ókpeni transplanttaý jasaldy.
UMC Ana men bala ortalyǵynda 15 jastaǵy qyzǵa búırekti transplantattaý júrgizildi. Barlyq retsıpıentterdiń jaǵdaıy qanaǵattanarlyq, olar mamandardyń baqylaýymen ońaltýdan ótedi.
Sondaı-aq, ekinshi donorlyq búırek pen baýyr Astana qalasynyń Ulttyq ǵylymı onkologııalyq ortalyǵynda patsıentterge transplanttaldy.
Donorlyq aǵzalardy transplanttaý — eń kúrdeli operatsııalardyń biri, alaıda otandyq mamandar ony sátti ótkizdi.
Júrek pen ókpeni transplanttaý qaıtys bolǵan donordan mıdyń ólimi rastalǵan kezde ǵana júzege asyrylady. Alaıda, odan ári protsess kóbinese donordyń jaqyn týystarynyń sheshimine baılanysty.
Aǵzalardy transplanttaýdy sátti júrgizý - bul ártúrli memlekettik jáne medıtsınalyq qyzmetterdiń úılesimdi toptyq jumysy. Transplantologtar toby birinshi kezekte donordyń jaqyndary men týystaryna, aǵzalardy transplanttaý boıynsha birqatar kúrdeli operatsııalardy qaýipsiz júzege asyrýǵa kómekteskenderdiń barlyǵyna alǵysyn bildiredi.
