Qaıtarylǵan jerdiń kóbi halyqqa mal jaıý úshin berilip jatyr

Búgin Májilistiń jalpy otyrysynda Premer-Mınıstrdiń orynbasary Tamara Dúısenova jaıylymdyq jerlerdi utymdy paıdalaný qadamdary jaıyndaǵa aıtty, dep habarlaıdy Kazinform.

«Jalpy, Aýyl sharýashylyǵyna memlekettik qoldaý kórsetý úshin Úkimet júıeli sharalar qabyldap jatyr. Máselen, osy salaǵa bólingen sýbsıdııa kólemi 430 mlrd teńgege deıin ósti. Kóktemgi egis jáne kúzgi egin oraǵy naýqanyna jyl saıyn beriletin jeńildetilgen nesıe kólemi 70-ten 140 mlrd teńgege artty. Salaǵa salynǵan ınvestıtsııalardyń kólemi 72 paıyzǵa artyp, 850 mlrd teńgege deıin jetti», - dedi T. Dúısenova.

Onyń aıtýynsha, azyq-túlik qaýipsizdigin qamtamasyz etý isinde elimizdiń jer resýrstaryn, onyń ishinde aýyl sharýashylyǵy maqsatyndaǵy jerlerdi utymdy jáne tıimdi paıdalaný máselesi óte ózekti.

«Osy oraıda paıdalanylmaı bos jatqan nemese bir kezde zańsyz berilgen aýyl sharýashylyǵy jerlerin, onyń ishinde jaıylymdyq jerlerdi qaıtarý úshin belsendi jumys jalǵasyp jatyr. 2022 jyldyń basynan beri 8,5 mln gektardan astam jer qaıtaryldy, onyń 2,8 mln gektary qazirdiń ózinde eldiń ıgiligine berildi. Qaıtarylǵan jerdiń kóbi halyqqa mal jaıý úshin berilip jatyr. Bul rette tıisti zańnamalyq aktilerge jaıylymdardy paıdalaný máselesi boıynsha ózgerister engizý úshin Parlament depýtattarynyń bastamasymen aýqymdy jumys jasalyp jatqanyn atap ótkim keledi. Bul ózgerister, jaıylymdardy basqa jer túrlerine aýystyrýǵa tyıym salý, olardy mal jaıý úshin rezervke qoıý, jaıylymdyq jerlerdi alý normatıvterin ulǵaıtý jáne basqa da normalar arqyly jaıylymdyq jerlerdi utymdy paıdalanýǵa múmkindik beredi», - dedi Úkimet basshysynyń orynbasary.