Qaıtarylǵan aktıvterdiń qanshasy memleket menshigine ótti
ASTANA. KAZINFORM – «Qaıtarylǵan aktıvterdi basqarý kompanııasy» JShS óz balansyna qabyldanatyn múliktiń málimetterinen sáıkessizdik kórse, memleket menshigine alýdan bas tarta alady. Bul týraly Qarjy mınıstrliginiń Kazinform saýalyna joldaǵan jaýabynda aıtylǵan.
«Qaıtarylǵan aktıvterdi basqarý kompanııasy» JShS 100% memlekettiń menshigindegi mekeme bolyp esepteledi. Basqarýshy kompanııanyń negizgi mindetteriniń biri – memleketke qaıtarylǵan aktıvterdi memlekettiń atynan menshikke qabyldaý. Aqshalaı qarajat túrindegi aktıvter basqarýshy kompanııany aınalyp ótip, tikeleı Arnaıy memlekettik qorǵa aýdarylady.
Aktıvterdiń málimdelgen jaı-kúıine sáıkes kelmeýi anyqtalǵan kezde aktıvterdiń sáıkessizdigi týraly akt jasalyp, aktıvterdi qaıtarý jónindegi ýákiletti organǵa habarlanady. Eger aktıv joǵalǵan nemese aktıvke qajetti quqyqty rastaıtyn qujattar bolmaǵan jaǵdaıda, basqarýshy kompanııa ony qabyldaýdan bas tartýy múmkin», - dep jazylǵan mınıstrlik málimetinde.
Aktıvter qabyldanǵannan keıin basqarýshy kompanııa olardyń saqtalýyn jáne qyzmetin qamtamasyz etý úshin kúzet uıymdaryn tartyp, kommýnaldyq jáne ózge de qyzmet kórsetý sharttaryn jasaýǵa, múlikti joǵaltý táýekelderinen saqtandyrýǵa haqyly.
Aktıvter satylǵanǵa deıin kompanııa olardy jalǵa berý, senimgerlik basqarý, óz betimen basqarý arqyly úzdiksiz jumys isteýin qamtamasyz etedi.
«Basqarýshy kompanııa qurylǵan sátten bastap (2023 jyldyń 21 qyrkúıegi – red.) 2024 jylǵy 17 qazanǵa deıin kompanııanyń balansyna 62 aktıv berildi: 1 turǵyn úı; 2 ákimshilik ǵımarat; 7 kommertsııalyq ǵımarat; «Dýman» qonaq úı kesheni; «Dýman» qonaqúı kesheniniń negizgi quraldary jáne tehnıkalyq-materıaldyq qundylyqtary; 5 zańdy tulǵanyń jarǵylyq kapıtalyna qatysý úlesteri; 1 óndiristik baza; 1 ashana; 1 janarmaı quıý stantsııasy; 13 jer ýchaskesi; «Orıon» bıznes ortalyǵynyń 1 aıaqtalmaǵan qurylysy jáne «Baısat» saýda úıi túrindegi 1 múlik», - dep jazady mınıstrliktegiler.
Sondaı-aq, kompanııaǵa 196 dana zergerlik buıym, kollektsııalyq moneta, kádesyı jáne aksessýar tapsyrylǵan.
«Sonymen qatar, shetelden qaıtarylǵan aktıvter bar: 2 avtokólik, Dýbaıdaǵy 2 vılla, Frantsııanyń Antıb qalasyndaǵy 4 páter, Túrkııadaǵy 2 úı jáne 1 páter, Máskeýdgie 5 páter, 5 qoıma jáne 5 avtoturaq orny.
Buǵan qosa, jalpy quny 2,5 mlrd teńge bolatyn 7 jer ýchaskesi men turǵyn úıdi berý týraly kelisimsharttarǵa qol qoıyldy. Sondaı-aq, 390 mln teńge somasyndaǵy kompanııanyń jarǵylyq kapıtalyna qatysý úlesin berý protsesi júrip jatyr», - delingen jaýapta.
Aıta ketsek, buǵan deıin Qazaqstan qaıtarylǵan aktıvterdi satýdan qansha tabys tapqany týraly málimet berilgen bolatyn.
Sondaı-aq Úkimettiń baspasóz qyzmeti Túrkistan jáne Aqmola oblystarynda memleketke qaıtarylǵan qarajat esebinen áleýmettik nysandar salynatynyn málim etti.
