«Qaısar» bıyl sheteldik oıynshylardan bas tartty

QYZYLORDA. KAZINFORM - Qyzylordalyq «Qaısar» komandasy bıyl sheteldik fýtbolshylardan bas tartty. Endi olar tek qazaqstandyq fýtbolshylarǵa senim artady.

Bul jóninde oblystyq Dene shynyqtyrý, sport jáne týrızm basqarmasynyń basshysy Baqtııar Artaev málim etti.

– Bul sheshimdi jergilikti turǵyndar ártúrli qabyldady. Elimizde jankúıerler tarapynan qazaqstandyq oıynshylarǵa kóńil bólý qajettigi týraly jıi aıtylady. Dese de qazirge deıin naqty qadam jasalǵan joq. Nege biz el jastaryna úmit artpaımyz? Talanttarǵa nege jol ashpaımyz? Jańadan jasaqtalǵan komanda alǵashqyda qarsylasyna qaýqar kórsete almaýy múmkin. Alaıda árbir oıynda olar tájirıbesin arttyrady, sheberligin jetildiredi. Olardyń arasynan myqty fýtbolshylar shyǵady degen oıdamyn. Qazir komandanyń 700 mln teńgege jýyq qaryzy bar. «Qaısardyń» basshylyǵyna kelgen azamattar odan qutylýdyń jolyn qarastyryp jatyr. Ol demeýshilerden túsken qarjy esebinen jabylady, – dedi basqarma basshysy.

Qazir qyzylordalyq klýb Túrkııa jerinde oqý-jattyǵý jıynyn ótkizýde.

«Qaısar» fýtbol klýbynyń dırektory Talǵat Ábdiǵapparuly qazir demeýshilermen kelisimshartqa qol qoıylǵanyn atap ótti. Sondaı-aq komandaǵa aqsha túsirý maqsatynda qosymsha qarjy kózderi qarastyrylyp otyr.

Qazir oblys ortalyǵynda boı kóterip jatqan 11 myń jankúıerge arnalǵan jańa stadıon bıyl mamyr aıynda paıdalanýǵa berilmek. Ol ÝEFA-nyń úshinshi kategorııa talabyna saı keledi. Bul talap boıynsha komanda eýrokýboktyń toptyq kezeńindegi oıyndaryn da óz stadıonynda ótkizýine múmkindigi bar.

Eske salsaq, fýtboldan Eýropa chempıonatynda Qazaqstan jastar quramasy Anglııamen bir topqa tústi.