«Qaırattyń» Chempıondar lıgasyndaǵy oıyndary Astanada ótedi

ALMATY. KAZINFORM – «Qaırat» ÝEFA Chempıondar lıgasy aıasynda «Olımpıakos» jáne «Brıýggemen» Astanada oınaıdy.

«Qaırat» fýtbol klýby ÝEFA-men birlese otyryp, Chempıondar lıgasynyń jalpy kezeńinde «Olımpıakos» (9 jeltoqsan), «Brıýgge» (20 qańtar) komandalaryna qarsy óz alańyndaǵy matchtaryn «Astana Arena» stadıonyna kóshiretinin habarlady.

- Almatydaǵy Ortalyq stadıonda matchty qysta ótkizý tájirıbesi kórsetkendeı, tómen temperatýra, shatyrdyń joqtyǵy, qar jaýý qaýpi jankúıerler úshin qolaısyzdyq týǵyzyp, alań qyzmetin qıyndatady. Kórermenderge jaıly ári qaýipsiz jaǵdaı jasaý úshin match jabyq stadıonda ótedi, - delingen klýb málimdemesinde.

Sondaı-aq almatylyq klýb bılet baǵasy 15 000 – 50 000 teńge aralyǵynda bolatynyn málimdedi. Bıletter 28 qarashadan bastap Qairat SuperApp jáne Freedom SuperApp mobıldi qosymshalarynda satyla bastaıdy. Bir adamǵa eki bıletten artyq rásimdeýge bolmaıdy.

Eske salaıyq, «Qaırattyń» óz alańyndaǵy «Real Madrıd» jáne «Pafos» komandalaryna qarsy oıyndarda bılet 30-250 myń teńge aralyǵynda satyldy.