«Qaırat» shabýylshysy Dastan Sátpaev «Brıýggemen» oıynǵa qatyspaıdy

ASTANA.KAZINFORM - «Qaırat» komandasynyń bas bapkeri Rafael Ýrazbahtın UEFA Chempıondar lıgasy negizgi kezeńi jetinshi týryndaǵy Belgııanyń «Brıýgge» (Brıýssel) komandasymen kezdesý aldynda baspasóz máslıhatyn berdi.

Bas bapker komanda quramyna qysqy transferlik kezeńde qosylǵan fýtbolshylardyń aldaǵy oıyndarǵa qatysa almaıtynyn atap ótti.

- Sondyqtan biz ótken maýsymnan almatylyq klýb namysyn qorǵap júrgen jigitterge senim artamyz. Quramda aıtarlyqtaı ózgeris joq. Ótken maýsymnyń aıaq sheninde ota jasatqan Ofrı Arad aldaǵy kezdesýge qatyspaıdy. Sondaı-aq Dastan Sátpaevqa da úmit arta almaımyz. Ol jaraqatynan emdelip, oqý-jattyǵý jıynynan tys qaldy. Eń bastysy, bizge fýtbolshynyń densaýlyǵynyń jaqsy bolǵany kerek. Biz Chempıondar lıgasyndaǵy ornymyzdy bilemiz. Negizgi oıyndar alda dep sanaımyz. Aldymyzǵa úlken maqsattar qoıyp otyrmyz. Qazirge deıin qarsylastardyń barlyǵy ońaı bolǵan joq. Barlyǵy derlik joǵary deńgeıdegi komandalar dep aıta alamyn, - dedi ol baspasóz máslıhatynda.

Kezdesý 20 qańtarda kúni saǵat 20:20-da elordadaǵy «Astana-arena» stadıonynda bastalyp, «Qazaqstan» telearnasynan tikeleı efırde kórsetiledi.

Qazirge deıin «Qaırat» Portýgalııanyń «Sportıngine» 1:4, Ispanııanyń «Real Madrıdine» 0:5, Italııanyń «Interine» 1:2, Grekııanyń «Olımpıakosyna» 0:1, Danııanyń «Kopengagenine» 2:3 esebimen jol berse, Kıprdiń «Pafosymen» 0:0 esebimen teń tústi.

Aıta ketsek, UEFA Chempıondar lıgasy negizgi kezeńi jetinshi týryndaǵy qazaqstandyq «Qaırat» (Almaty) jáne Belgııanyń «Brıýgge» (Brıýssel) komandalary arasyndaǵy kezdesýde qaı eldiń tóreshileri qyzmet atqaratyny belgili boldy.

Bul mindet Lıtvadan kelgen Donatas Rýmshas bastaǵan tóreshiler brıgadasy atqaratyn bolady.
Oǵan otandastary Aleksandr Radıýs pen Dovıdas Sýjedelıs kómektesedi. Tórtinshi tóreshi de sol eldiń ókili Robertas Valıkonıs.