Qaırat Satybaldy merziminen buryn bosatylýy múmkin be

Qaırat Satybaldynyń sotqa bergen ótinishi onyń birden bosatylanyn bildirmeıdi. Bul týraly Bas prokýrordyń orynbasary Áset Shyndalıev aıtty, dep habarlaıdy Kazinform.

Búgin Parlament Májilisinde ótken Úkimet saǵatynan keıin tilshiler Bas prokýrordyń orynbasarynan 6 jylǵa sottalǵan Qaırat Satybaldynyń sot belgilegen jazany ózgertý týraly ótinish joldaýyna qatysty suraq qoıdy.

«Ondaı ótinim boldy jáne ol sotqa joldandy. Biraq bul ótinishtiń sotta qashan qaralatynyn naqty aıta almaımyn. Mundaı ótinish berýge sottalǵandardyń quqyǵy bar. Naqty sheshimdi sot shyǵarady», - dedi Á. Shyndalıev.

Bul turǵyda ol sottalǵandardyń merziminen buryn bosatý nemese jaza túrin aýystyrý týraly ótinish túsirýge quqyǵy bar ekenin, biraq biraz qylmystar boıynsha ondaı quqyqty qoldanýǵa tyıym salynǵanyn eske saldy. Atap aıtsaq, terrorıstik, ekstremıstik baptary boıynsha sottalǵandar jazadan bosatylmaıdy.

«Budan basqa kez kelgen adamnyń ótinish berýge quqyǵy bar. Bul aryz (Q. Satybaldynyń) sottyń qaraýynda. Onyń bul ótinishti bergeni birden bostandyqqa shyǵady degendi bildirmeıdi. Sot bosatý nemese bas tartý týraly sheshim qabyldaı alady», - dedi Áset Shyndalıev.

Eske salsaq, byltyr Qaırat Satybaldyǵa sot úkimi shyǵyp, ol 6 jylǵa sottaldy.