Qaırat Nurtaspen janjaldasqan jolaýshy 10 táýlikke qamaldy

ASTANA. KAZINFORM – Almaty qalasynyń ákimshilik quqyq buzýshylyq ister jónindegi mamandandyrylǵan aýdanaralyq soty Qaırat Nurtaspen ushaqta janjaldasqan jolaýshyǵa qatysty isti qarap, qaýly shyǵardy.

Sot anyqtaǵandaı, 2024 jyldyń 4 maýsymynda Asylbek Bekqaıyrov Almaty-Astana baǵytynda ushaq bortynda Qaırat Aıdarbekovpen (Nurtas – red.) janjal shyǵaryp, arty tóbeleske ulasqan.

«Ushaq bortyndaǵy tóbeles kezinde ol ádepsiz sózder aıtqan. A.Bekqaıyrov óz áreketimen qoǵamdy syılamaýshylyq tanytyp, qoǵamdyq tártipti buzǵan», - dep jazylǵan sot habarynda.

Sot otyrysynda A.Bekqaıyrov óz kinásin moıyndamaǵan.

QR Ákimshilik quqyqbuzýshylyqtar týraly 434-baptyń 1-bóliginiń sanktsııasy 20 AEK mólsherinde aıyppul salýǵa nemese 5-ten 15 táýlikke deıingi merzimge ákimshilik qamaqqa alý sharasy qarastyrylǵan.

«Sot qaýlysymen A.Bekqaıyrov ÁQBtK-niń 434-babynyń 1-bóliginde kózdelgen ákimshilik quqyqbuzýshylyqty jasaǵany úshin kináli dep tanylyp, 10 táýlikke qamaýǵa alý túrindegi ákimshilik jaza taǵaıyndaldy. Sot qaýlysy zańdy kúshine engen joq», - dep habarlady sot.

Aıta keteıik, Asylbek Bekqaıyrov pen Qaırat Nurtas – burynnan dos. Janjaldyń basty sebebi – ánshiniń shaqyrǵan toıǵa barmaýy.

Buǵan deıin Astana qalasynyń ákimshilik ister boıynsha mamandandyrylǵan soty Qaırat Nurtastyń buzaqylyq isi boıynsha qaýly shyǵardy.