Qaırat Mámı jergilikti sottardyń jumysyn synady

ASTANA. 24 qazan. QazAqparat - Joǵarǵy Sot Tóraǵasy Qaırat Mámı beınekonferentsbaılanys arqyly oblystyq jáne oǵan teńestirilgen sottardyń tóraǵalarymen jáne sýdıalarymen, sýdıa ádebi jónindegi óńirlik komıssııalardyń jetekshilerimen, oblys ortalyqtary men qala mańynda ornalasqan aýdandyq sottardyń tóraǵalarymen jumys keńesin ótkizdi. Kún tártibindegi basty másele respýblıkada sot tóreligin júzege asyrýdyń qazirgi jaı-kúıi boldy. Bul týraly QR Joǵarǵy Sotynyń baspasóz qyzmeti habarlaıdy.

Q. Mámı qazaqstandyq sottardyń aǵymdaǵy jyldyń 9 aıy boıynsha jumys qorytyndylary qysqasha toqtalyp, sot júıesindegi kezek kúttirmeı dereý sheshýdi talap etetin ózekti máselelerge basa nazar aýdardy.

Mysaly, aqtaý úkimderi sanynyń kóbeıýimen birge elde kúshi joıylǵan jáne ózgergen sot aktileriniń sany úzdiksiz ósýde. Respýblıka boıynsha sot aktileriniń ortasha 9,5%-na shaǵym jasalyp, árbir ekinshi sot sheshiminiń kúshi joıylady.

Tek aǵymdaǵy jyldyń 9 aıynda aýdandyq sottardyń 1796 adamǵa qatysty úkimderi qate dep tanyldy. Bul byltyrǵy jylǵa qaraǵanda 2 %-ǵa joǵary. Jergilikti sottardyń 6 myńǵa jýyq sheshimderiniń kúshi joıylǵan. Qadaǵalaý jáne kassatsııalyq satydaǵy sottar Almaty qalasy sottarynyń 45 sheshimin, Astana qalasy sottarynyń 18 sheshimin jáne Shyǵys Qazaqstan oblysy sottarynyń 16 sheshimin qalpyna keltirdi.

Q. Mámıdiń aıtýy boıynsha, óńirlerdegi mundaı ahýal keıbir oblystyq sottardyń jergilikti jerlerdegi istiń jaǵdaıy úshin jaýapkershilikten shet qalǵanyn, al birinshi satydaǵy sottar eshqandaı praktıkalyq kómek almaı, óz betterimen ketkenin dáleldeıdi.

"Oblystyq sottardaǵy sýdıalardyń biliktiligi ne tómen, ne istiń damýynda belgili bir múdde bar degen oı týady. Osyndaı sátter halyqtyń sottarǵa degen senimsizdik pen narazylyqty týdyrady, - dep atap ótti Joǵarǵy Sot Tóraǵasy. - Mine, biz sot aktileriniń 90 %-dan astamy zańdy ári ádil dep tanylǵanyn maqtanyshpen aıtamyz. Al qalǵan birneshe paıyz bul sýdıalardyń kemshiligindegi tek qurǵaq tsıfr ǵana emes, bul - adam taǵdyry. Bıyl eki myńǵa jýyq adam sýdıalar qateliginiń qurbany boldy. Sot bıligi bedeliniń tómendeýi men sýdıalarǵa degen senimsizdiktiń basty sebebi osynda. Osynyń nátıjesinde biz qoǵammen túsinise almaı júrmiz".

Keńeske qatysýshylar Astanada 20 qarashada ótetin Qazaqstan sýdıalarynyń VI seziniń daıyndyq barysyna erekshe nazar aýdardy. Joǵarǵy Sotta forýmdy uıymdastyrý, aqparattyq jáne tehnıkalyq qoldaý jaǵyna jaýap beretin arnaıy jumys toby quryldy. Sezdiń jumysyna Memleket basshysy Nursultan Nazarbaev qatysady dep kútilýde. Qazaqstandyq sottardyń ishinen 600-den artyq delegat bolady. Shetelden Joǵarǵy Sot tóraǵalary basqarǵan taǵy da 20 delegatsııa keledi.