«Qaırat» chempıondyqqa talasty jalǵastyrady

ALMATY. KAZINFORM - Almatylyq «Qaırat» fýtbol klýby Qazaqstan Premer-lıgasynyń HHV týrynda «Ordabasy» komandasyn jeńip, chempıondyq talasty jalǵastyratyn boldy. 

Bıyl almatylyq komanda kóp jyldan keıin bas júldege qol jetkizýge jaqyn tur. Olar chempıondyqqa talasty elordalyq «Astana» ekeýi qyzdyra tústi.

Búgin almatylyq komanda jeńilip nemese teń túsip qalǵan jaǵdaıda basty qarsylasynyń altyn medal alýyna múmkindik jasar edi. Sondaı-aq «Ordabasy» da áli chempıondyqtan kúder úzgen joq bolatyn.

Kezdesý barysynda almatylyq komanda sapynan Elder Santana 42-mınýtta esep ashsa, shymkenttik klýbtan Erkebulan Tuńǵyshbaev 75-mınýtta tarazy basyn teńestirdi. Alaıda 85-mınýtta «Qaırat» sapynan Oljas Baıbek jeńisti goldy soqty. Osylaısha «Qaırat» qarsylasyn 2:1 esebimen jeńip, týrnır kestesinde 44 upaımen birinshi orynǵa kóterildi. Sol arqyly chempıondyqqa talasty jalǵastyrýǵa múmkindik aldy. 

Olardan bir oıyn kem ótkizgen «Astananyń» 43 upaıy bar. Elordalyq klýb 3 qarashada syrt alańda «Tobylmen» oınaıdy.

Atalǵan týrda búgin Petropavldyń «Qyzyljary» óz alańynda qyzylordalyq «Qaısardy» 6:2 esebimen qapy qaldyrdy. 

Endi 3 qarashada «Shahter» (Qaraǵandy) men «Aqtóbe», «Turan» (Túrkistan) men «Jeńis» (Astana), «Jetisý» (Taldyqorǵan) men «Atyraý» oınaıdy.

Eske salsaq, «Astana» komandasy el birinshiliginiń keıinge qaldyrylǵan 17-týrynda «Atyraýdy» jeńip, kósh basyna shyqqan edi.