«Qaırat» – «Brıýgge» arasyndaǵy oıynnyń bıletteri satylymǵa shyqty

ALMATY. KAZINFORM – Almatynyń «Qaırat» fýtbol klýby ÝEFA Chempıondar lıgasynyń jalpy kezeńindegi jetinshi týr aıasynda Belgııanyń «Brıýgge» komandasymen oınaıdy. Qazir bul matchtyń bıletteri satylymǵa shyqty.

Kezdesý 20 qańtarda «Astana Arena» stadıonynda ótedi. Oıynnyń Qazaqstan ýaqytymen saǵat 20:30-da bastalady. 

Bıletterdiń baǵasy oryn sanatyna qaraı 15, 25 jáne 35 myń teńge bolyp belgilengen. 

Satyp alýshy bıletti alý úshin JSN, uıaly telefon nómiri jáne elektrondy poshta mekenjaıyn kórsetýi qajet. Bir qolǵa eki bıletten artyq satylmaıdy, tólem tek bir bank kartasymen júzege asyrylady. 

Bıletter elektrondy formatta beriledi: match kúni SMS-habarlama joldanyp, kórsetilgen elektrondy poshtaǵa QR-bılet siltememesi jiberiledi. 

Bıletterdi Freedom SuperApp jáne Qairat SuperApp mobıldi qoldanbalarynan satyp alýǵa bolady.

Bılet operatorlary jankúıerlerdi tek resmı servısterdi paıdalanýǵa jáne deldaldar men jalǵan usynystardan saq bolýǵa úndedi. Bıletterdi beıtanys adamdardan satyp alǵandar stadıonǵa kire almaı qalýy múmkin. Mundaı jaǵdaıda qarajat qaıtarylmaıdy. 

Aıta keteıik, Chempıondar lıgasyndaǵy alty matchtan keıin «Qaırat» bir upaımen týrnır kestesinde 36-orynda tur. Aldyńǵy týrda almatylyq komanda grekııalyq «Olımpıakos» komandasynan 0:1 esebimen jeńilgen edi. 

Sondaı-aq «Qaırat» 28 qańtarda syrt alańda londondyq «Arsenalmen» kezdesedi.

Eske salaıyq, buǵan deıin Qazaqstan Premer-lıgasynda top jaryp, klýb tarıhynda Chempıondar lıgasynyń negizgi kezeńine alǵash ret joldama alǵan «Qaırattyń» quramynda 2025 jyldyń qorytyndysy boıynsha birqatar ózgeris bolǵanyn jazǵanbyz.