Qaıyńnyń sólin alǵandarǵa 40 myń teńgege jýyq aıyppul bar

PETROPAVL. KAZINFORM — Soltústik Qazaqstan oblysynda tabıǵat qorǵaýshylar qaıyń sólin alǵandarǵa ákimshilik jaza bar ekenin eskertip jatyr. 

SQO tabıǵı resýrstar jáne tabıǵat paıdalanýdy retteý basqarmasynyń mamany Sáýle Súleımenovanyń aıtýynsha, kóktemniń jyly kúnderi kelisimen aǵashtyń kóptegen túri sól bóle bastaıdy. Sonyń ishinde qaıyńnyń sóli kópshilik arasynda suranysqa ıe, ony sergitetin sýsyn retinde paıdalanady.

— Qaıyń shyrynyn súıetinder kún jylynysymen balta-pyshaq jáne ydys alyp, ormanǵa attanady. Qaıyń shyrynyn alý úshin aǵashty aıaýsyz búldiredi. Saldarynan aǵashqa zııan kelip, adam salǵan jara kópke deıin jazylmaıdy, mundaı aǵash tez shirıdy, qabyǵy arshylǵan jer arqyly túrli ósimdikke qaýipti ınfektsııalar enýi múmkin. Qaıyńnyń sóli aǵash úshin mańyzdy, butaqtarǵa qorektik zat tasymaldaıtyn fýnktsııasy bar, sol arqyly aǵash «oıanyp», ári qaraı ósedi, búrshik jarady, — deıdi Sáýle Súleımenova.

Mamannyń aıtýynsha, qaıyń shyryny memlekettik orman qorynda, aldaǵy ýaqytta kesilýi tıis ýchaskelerde júrgiziledi.

Shyryn daıyndaý úshin zańdy tulǵalar men jeke kásipkerlerdiń qolynda memlekettik orman sharýashylyǵy jazyp bergen orman bıleti bolýy tıis. Qaıyń shyrynyn daıyndaýdy júzege asyrýǵa bolatyn orman ýchaskeleri týraly qajetti aqparatty alý úshin turǵylyqty jeri boıynsha orman sharýashylyǵyna júginý qajet, onda orman zańnamasynda belgilengen tártippen qajetti aqparatty alýǵa bolady.

Jeke tulǵalarǵa qaıyń shyrynyn zańsyz jınaǵany úshin 10 AEK mólsherinde (39 320 teńge), laýazymdy tulǵalarǵa, shaǵyn kásipkerlik sýbektilerine — 30 AEK (117 960 teńge), orta kásipkerlik sýbektilerine — 50 AEK (196 600 teńge), iri kásipkerlerge — 100 AEK (393 200 teńge) aıyppul bar.

Buǵan deıin SQO-da kóktem erte kelip, órt shyǵý jaǵdaıy kóbeıgenin jazǵan edik.