«Qaıdasyńdar, qazaq balýandary?» - baspasózge sholý
***
«Egemen Qazaqstan» gazetiniń búgingi sanynda «Aıtylmaǵan aqıqat» atty kólemdi maqala berilgen. Uly Otan soǵysynyń keıbir qupııalaryn arqaý etken bul maqalada zertteýshilerdiń málimetteri usynylyp otyr. Daıyndyǵy birshama joǵary bolyp, Batystaǵy shekaraǵa jaıǵastyrylǵan kásibı qyzyl ásker soǵystyń alǵashqy aılarynda-aq jaýdyń joıqyn kúshine tótep bere almaı qyryldy nemese mıllıondap tutqynǵa tústi. «Olar bizge joldastar emes» degen eńbeginde nemis zertteýshisi K.Shtraıt fashısterdiń «Soltústik», «Ortalyq» jáne «Ońtústik» toptary 1941 jyldyń 5 tamyzynan 16 qarashaǵa deıingi úsh aıda ǵana 2 465 000 keńes áskerin tutqyndaǵanyn aıtady. (Shtraıt K., «Onı nam ne tovarışı», M., «Rýsskaıa panorama», 2009, s.87). Al qaza bolǵandary qansha ekenin eshkim áli naqty aıta alǵan joq. Keńestik zertteýshilerdiń esebi boıynsha alǵashqy tórt aıda tutqynǵa túskenderdiń sany budan da artyq.
Bas basylymda «SKIFNEWS.KZ» onlaın-gazetiniń bas redaktory Abaı Balajannyń «Qaıdasyńdar, qazaq balýandary?» degen maqalasy berilgen. «Kúres túrlerinen álemde Qap taýy jigitteriniń aldyna túser eshkim joǵyn qazir ekiniń biri moıyndaıdy. Búginde daǵystandyqtar men osetınderdi, sheshender men ıngýshtardy Reseı quramasyn bylaı qoıǵanda kemi onshaqty memlekettiń ulttyq quramalarynan keziktiresiń. Taý halqynyń ókilderi qazaq jigitterinen myqty degenge namystanasyń. Iá, Qajymuqan men Balýan Sholaqtyń urpaqtary kavkazdyqtardyń aldynda qaýqarsyz bolyp tur. Namystansań da, yzaǵa býlyqsań da búgingi shyndyq osy»,-dep jazady maqala avtory.
***
«Aıqyn» basylymynyń búgingi sanynda «Qazyna izdeýshiler qazaq jerin tonap jatyr» degen maqala kópshilik nazaryna usynylyp otyr. Prezıdent N.Nazarbaev óziniń bıylǵy Joldaýynda «jalpyqazaqstandyq mádenıetti damytýǵa jańasha serpin berý» mindetin qoıdy. Osyǵan oraı el Úkimetine «Mádenı saıasattyń uzaqmerzimdi tujyrymdamasyn» ázirleý týraly tapsyrma júktedi. «Onda qazaqstandyqtardyń básekege qabiletti mádenı mentaldiligin qalyptastyrýǵa, zamanaýı mádenıet klasterlerin damytýǵa baǵyttalǵan sharalar belgilenýi kerek» dedi Elbasy. Bul jańa qujat «Mádenı mura» baǵdarlamasyn aýystyratyn bolady. Keshe Mádenıet jáne aqparat mınıstrliginiń ókilderi Tujyrymdama jobasy 1 shildege deıin daıyn bolatyndyǵyn málim etti.
Osy basylym Bas prokýror Ashat Daýylbaevtyń málimetterin keltire otyryp, Qazaqstannyń bas qalasy, ókinishke qaraı, qylmys deńgeıi boıynsha elimizde birinshi oryndy ıelengenin jazyp otyr. Astanada strategııalyq ǵımarattar men nysandardyń, qalalyq tirshilikti qamtamasyz etýshi obektilerdiń jáne qoǵamdyq oryndardyń qaýipsizdigi kúsheıtilýge tıis! Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi Úılestirý keńesiniń otyrysynda Prezıdenttiń kómekshisi - Qaýipsizdik keńesiniń hatshysy Qaırat Qojamjarov osyndaı nusqaý berdi. Onyń aıtýynsha, elordada uıymdasqan qylmysqa, ekstremızm men terrorızm kórinisterine, zańsyz kóshi-qonǵa qarsy turýdyń laıyqty júıesin qurý ózekti bolyp otyr. Bul jaıynda «Qylmystyń kóbin kelimsekter jasaıdy» degen maqaladan oqı alasyzdar.
