Qaı óńirlerde jalaqy kólemi joǵary

ASTANA. QazAqparat – Bıyldyń ekinshi toqsanynda jaldamaly qyzmetkerlerdiń ortasha aılyq ataýly jalaqysy 287,1 myń teńgege jetip, byltyrǵy sáıkes kezeńmen salystyrǵanda 22,9 paıyzǵa ósken, dep habarlaıdy QazAqparat ranking.kz saıtyna silteme jasap.

2021 jyldyń osy kezeńinde shaǵyn kásiporyndardy qosa alǵanda, qazaqstandyq kompanııalar qyzmetkerleriniń ortasha aılyq ataýly jalaqysy 2020 jyldyń ekinshi toqsanymen salystyrǵanda 18 paıyzǵa ósip, 233,5 myń teńgeni qurady.

Sala boıynsha alyp qaraǵanda, bıylǵy ekinshi toqsanda eń joǵary ortasha aılyq ataýly jalaqy taý-ken óndirý ónerkásibi men karerlerdi qazý (561,6 myń teńge), sondaı-aq qarjy ári saqtandyrý qyzmeti (540,4 myń teńge) salalarynda belgilendi.

Odan keıingi orynda aqparat pen baılanys (378,9 myń teńge), ǵylymı jáne tehnıkalyq qyzmet (378,7 myń teńge), sondaı-aq kólik ári qoıma sharýashylyǵy (330,4 myń teńge) salalary ornalasqan.

Eń tómen ortasha aılyq ataýly jalaqy sýmen jabdyqtaý, qaldyqtardy jınaý, óńdeý, lastanýdy joıý jónindegi qyzmetke (167,9 myń teńge), sondaı-aq aýyl, orman ári balyq sharýashylyǵy (171,1 myń teńge) salalaryndaǵy jumysshylarǵa jáne óner, oıyn-saýyq pen demalys (179,4 myń teńge) sektoryndaǵy qyzmetshilerge tıesili.

Óńirlik turǵyda 2022 jyldyń ekinshi toqsanynda eń joǵary ortasha aılyq ataýly jalaqy munaı óndirýshi Atyraý jáne Mańǵystaý oblystarynda tirkeldi. Tıisinshe, bul óńirlerde 471,9 myń jáne 414,8 myń teńge boldy. Odan keıingi orynda Ulytaý oblysy (364 myń teńge), Astana (346,7 myń teńge) jáne Almaty (314,8 myń teńge) qalalary tur.

Al eń tómengi jalaqy Soltústik Qazaqstan oblysynda (212,1 myń teńge), Shymkentte (218,7 myń teńge) jáne Qostanaı oblysynda (223,8 myń teńge) baıqaldy.