Qaı muǵalimder 56 kúnnen bólek qosymsha demalys ala alady

ASTANA. KAZINFORM — Pedagogter úshin eń mańyzdy áleýmettik kepildikterdiń biri — jyl saıynǵy aqyly eńbek demalysyna shyǵý ýaqytynyń uzaqtyǵyn belgileý. Onyń uzaqtyǵy barlyq pedagog úshin — kúntizbelik 56 kún, dep habarlaıdy QR Oqý-aǵartý mınıstrliginiń baspasóz qyzmeti.

 Peagogterge jyl saıyn aqyly eńbek demalysynyń 2 túri beriledi: negizgi jáne qosymsha.

Qosymsha demalys ekologııalyq qolaısyz jáne radıatsııalyq qaýpi bar aýmaqtarda turatyn pedagogter úshin qarastyrylǵan.

Onyń ishinde ekologııalyq qolaısyz aýmaqtarda turatyn pedagogter úshin qosymsha demalystyń uzaqtyǵy — 7 kúnnen 12 kúnge deıin, al radıatsııalyq qaýipti aýmaqtarda turatyn pedagogter úshin — 5 kúnnen 14 kúnge deıin.

Demalys ýaqytyna túsken mereke kúnderi eńbek demalysyna kirmeıdi. 

Eńbek demalysyn berý kezinde naqty jumys istegen ýaqyt qana esepke alynady.

«Eńbek demalysyn berý kezinde saýyqtyrýǵa arnalǵan járdemaqy laýazymdyq jalaqy mólsherinde tólenedi. Saýyqtyrý járdemaqysynyń mólsherin esepteý pedagogtiń demalys berilgen kúngi naqty júktemesin eskere otyryp, laýazymdyq aqy mólsherinde júrgiziledi, munda qosymsha aqy men ústemeaqy eseptelmeıdi», — deıdi bıýdjettik josparlaý departamentiniń eńbekaqy tóleý ádisnamasy basqarmasy basshysy Gúlaıym Toqpanova.

Pedagog qosymsha jumysty nemese ýaqytsha bolmaǵan qyzmetkerdiń mindetterin óziniń negizgi jumysynan bosatylmaı oryndaǵan jaǵdaıda bul laýazymdardy qatar atqarý bolyp sanalady.

Bul jaǵdaıda saýyqtyrýǵa arnalǵan járdemaqy pedagogke negizgi laýazymy boıynsha ǵana tólenedi. 

Eger pedagog qosymsha jumysty laýazymdardy qosa atqarý týraly jeke eńbek sharty boıynsha negizgi jumystan bos ýaqytynda atqarsa, saýyqtyrýǵa arnalǵan járdemaqy negizgi jumys úshin de, qosymsha jumys úshin de bólek tólenýi tıis.