Qatonqaraǵaı aýdanyndaǵy obalardyń erte temir dáýirine jatatyny anyqtaldy

ÓSKEMEN. QazAqparat – Shyǵys Qazaqstan oblysynyń Qatonqaraǵaı aýdany Aqqaınar aýylynyń janynda ornalasqan Shý qorymyn zertteý barysynda ár túrli jer ústi qurylysy bar elýden asa jerleý ǵuryptyq eskertkishteri shoǵyrlanǵany anyqtaldy, dep habarlaıdy QazAqparat «Berel» memlekettik tarıhı-mádenı qoryq-mýzeıiniń baspasóz qyzmetine silteme jasap.

Arheologtardyń aıtýynsha, obalar erte temir dáýiriniń erte kezeńine jatady. Mundaı boljam jasaýǵa obadaǵy jerleý ǵurpy negiz bolǵan. Obanyń qabir shuńqyrynda eki kisiniń máıiti qoıylǵan, birinshisi - qarý jaraq asynǵan iri deneli er adam. Qarýlardyń ishinde qola qanjar jáne qoladan jasalǵan aıbalta bar.

Sonymen qatar jebe salatyn qoramsaq tabyldy, onyń beldikke iletin qola ilmegi bar. Jebesiniń ushy súıekten jasalǵan. Al, qalǵandary qola.

Mamandardyń aıtýynsha, qarýlar shaıqasqa arnalmaǵan, sebebi kishkene etip jasalǵan.

Ekinshi máıit er adamnan keıin jerlengen. Onyń súıegi kishileý, jambas tusyna teri ústi toqylǵan qaltaǵa salynǵan qola aına qoıylǵan.

Máıittermen birge qysh ydystar jáne qoıdyń quıymshaq súıegi qoıylǵan. Qysh ydystardyń erneýinde órnekteri bar.

Aıta keterligi, Aqqaınar aýylynda júrgizilip jatqan arheologııalyq qazba jumystarynyń jetekshisi belgili arheolog Zeınolla Samashev.