Qaterli isik jasýshalarynda alǵash ret dementsııaǵa uqsas úderister anyqtaldy

ASTANA. KAZINFORM – Shotlandııadaǵy Cancer Research UK Scotland ortalyǵynyń ǵalymdary adamda qaterli isik paıda bolǵanǵa deıin dementsııaǵa uqsas buzylýlardy anyqtady. Bul týraly oxu.az habarlady. 

Atalǵan jańalyq eń qıyn onkologııalyq aýrýlardyń biri – uıqy beziniń qaterli isiginiń aldyn alý jáne emdeý ádisterin jasaýǵa kómektesýi múmkin. Zertteý nátıjeleri Developmental Cell jýrnalynda jarııalandy.

Mamandar uzaq ýaqyt boıy tyshqandardaǵy uıqy beziniń jasýshalaryn baqylap, saý jasýshalardy qaterli isik kletkalaryna aınaldyratyn mehanızmderdi zerttedi.

Zertteý barysynda qaterli isik paıda bolǵanǵa deıingi kezeńde aýtofagııa, ıaǵnı jasýshalardyń «qaldyqtardy qaıta óńdeý» protsesi buzylatyny anyqtaldy. Nátıjesinde artyq jáne paıdasyz aqýyzdar jasýshada jınalyp, dementsııa nemese basqa neırodegeneratıvti aýrýlardan zardap shekken mı jasýshalarynda kezdesetin jıyntyqtar túzedi.

Uqsas aqýyz agregattary adamnyń uıqy bezi tininde de tabylǵan. Bul qubylys onkologııalyq aýrýlardyń damýymen baılanysty bolýy múmkin ekenin kórsetedi.

Edınbýrgtegi Genetıka jáne qaterli isik ınstıtýtynyń professory Saımon Ýılkınson KRAS genindegi mýtatsııalar men aýtofagııanyń buzylýy qaterli isik aýrýynyń bastalýynda sheshýshi ról atqarýy múmkin ekenin aıtty. Bul mehanızmdi túsiný aýrýdy boljaýǵa jáne ony bolashaqta erte kezeńde toqtatýǵa kómektesedi.

Uıqy beziniń qaterli isigi eń qaýipti isikterdiń biri sanalady jáne kóbinese óte kesh kezeńde dıagnoz qoıylady, bul emdeý múmkindikterin shekteıdi. Ǵalymdar qazir jas, jynys jáne tamaqtaný ádetteri jasýshalarǵa qalaı áser etetinin zerttep, qaterli isik aýrýyn erte anyqtaý joldaryn izdestirip jatyr.

Eske sala keteıik, ǵalymdar qaterli isikti emdeý ádisin beıimdeý úshin ǵaryshta zertteý júrgizedi.