Qatarynan eki jeńisten keıin «Barys» komandasy «Kýnlýn Red Starǵa» ese jiberdi

ASTANA. KAZINFORM - Qazaqstandyq «Barys» komandasy búgin, 29 qazanda Qurlyqtyq hokkeı lıgasyndaǵy kezekti oıynyn elordada Qytaıdyń «Kýnlýn Red Star» (Beıjiń) komandasyna qarsy ótkizdi. 

Qazaqstandyq komanda eki oıyn qatarynan jeńiske jetip, týrnır kestesindegi jaǵdaıyn birshama jaqsartyp alǵan edi. Sondyqtan búgingi kezdesýde de jankúıerler olardan sondaı jetistikti kútti.

Eki komanda týrnır kestesinde qatarlas kele jatyr. Qaı-qaısysy da óz múmkindigin paıdalanyp, qajetti upaıdy oljalaýǵa bolatyn.

Kezdesý barysynda qos qarsylas tartysty oıyn ótkizdi. Ekinshi kezeńniń sońyna deıin tablodaǵy esep ózgergen joq. 

Oıynnyń 38-mınýtynda qytaılyq klýbtan Rýrk Sharte gol soqty. 

Úshinshi kezeńde qazaqstandyq komanda tarazy basyn teńestirýge kúsh saldy. Degenmen óz qaqpasyna gol jiberip aldy. Elordalyq klýb sońǵy mınýtta qaqpashyny altynshy hokkeıshige almastyrǵan edi. Bos qalǵan qaqpany Doıl Somerbı 59-mınýtta dál kózdedi.

Osylaısha «Barys» qarsylasyna 0:2 esebimen jol berdi.

Endi qazaqstandyq komanda budan keıingi úsh oıynyn elordada ótkizedi. Aldymen 3 qarashada Reseıdiń «Neftehımık» (Nıjnekamsk) komandasyn qabyldasa, 5 qarashada «Ak Bars» (Qazan), 7 qarashada «Avtomobılıst» (Ekaterınbýrg) klýbtarymen sheberlik baıqasady.