Qatarda Qazaqstannyń mádenıet kúnderi máresine jetti
ASTANA. KAZINFORM — Qatar Memleketinde Qazaqstan Respýblıkasynyń mádenıet kúnderi máresine jetti. Іs-shara aıasynda Doha qalasynyń turǵyndary men qonaqtary elimizdiń mádenı murasy, dástúrleri men zamanaýı ónerimen tanysýǵa múmkindik aldy.
Negizgi is-sharalar Darb ál-Saǵı mádenı-tarıhı ortalyǵynda ótti. Munda sándi-qoldanbaly óner kórmeleri, ulttyq ári zamanaýı dızaınerlik jumystar, sondaı-aq Qazaqstan Respýblıkasy Ulttyq mýzeıiniń ekspozıtsııasy usynyldy.
Baǵdarlama barysynda ulttyq dástúrler men sport túrleri kórsetildi. Onyń ishinde sheteldik kórermen sadaq atý, qusbegilik jáne qazaqtyń tazy tuqymdy ıtterimen ańshylyq ónerimen, kóshpeli órkenıet mádenıetimen tereńirek tanysty.
Kópshiliktiń kóńilinen shyqqan mádenı is-sharalardyń biri otandyq ónerpazdardyń qatysýymen ótken kontsert boldy. Atap aıtsaq, «Mezzo» vokaldyq toby men «Joshy» etno-folklorlyq ansambli álemdik klassıka men ulttyq mýzykalyq murany úılestirip, erekshe týyndylar usyndy.
Qatardaǵy Qazaqstan mádenıet kúnderiniń uıymdastyrylýy eki el arasyndaǵy mádenı dıalogty nyǵaıtyp, otandyq mádenıetti halyqaralyq deńgeıde nasıhattaýǵa yqpal etti. Aldaǵy ýaqytta Qazaqstanda Qatar Memleketiniń mádenıet kúnderin ótkizý josparlanǵan.