Qatar SІM basshysy resmı saparmen Qazaqstanǵa keldi

NUR-SULTAN. QazAqparat – Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Nur-Sultan qalasyna resmı saparmen kelgen Qatar Memleketi Premer-Mınıstriniń orynbasary - Syrtqy ister mınıstri sheıh Muhammed ben Abdýlrahman Ál Tánımen kelissózder júrgizdi, dep habarlaıdy QR SІM baspasóz qyzmeti.

Bul Qatar syrtqy saıası vedomstvosy basshysynyń Qazaqstanǵa alǵashqy kelýi, ol túrli salalardaǵy ekijaqty yntymaqtastyqty jandandyrýǵa serpin berýge baǵyttalǵan.

Kelissózder barysynda, saýda-ekonomıkalyq jáne ınvestıtsııalyq salalardaǵy Qazaqstan-Qatar qatynastarynyń aǵymdaǵy jaı-kúıi men damý perspektıvalary qaraldy. Taraptar halyqaralyq jáne óńirlik kún tártibindegi ózekti máseleler jóninde pikir almasty.

Qazaqstan aýmaǵynda aýyl sharýashylyǵy, geologııalyq barlaý jáne taý-ken ónerkásibi, kólik jáne logıstıka, sondaı-aq qarjy jáne bank qyzmeti salasyndaǵy birlesken jobalardy iske asyrýǵa múddelilik rastaldy. Taraptar sondaı-aq eki eldiń halyqaralyq jáne óńirlik uıymdar, sonyń ishinde BUU, AÓSShK, IYU jáne t.b. sheńberindegi ózara is-qımylynyń joǵary deńgeıin atap ótti.

Kelissózder qorytyndysy boıynsha Qatar damý qorynyń (Qatar Development Fund) qarajatyna Almaty oblysynyń Іle aýdanyndaǵy Ótegen Batyr kentinde perınataldyq ortalyǵynyń qurylysy týraly memorandýmǵa qol qoıyldy.

Sapar baǵdarlamasynda Qatar Memleketi Premer-Mınıstriniń orynbasary – Syrtqy ister mınıstri Qazaqstan Respýblıkasynyń Prezıdenti Qasym-Jomart Toqaevtyń qabyldaýynda bolady dep kútilýde.