Qatar Izraıl men HAMAS-qa Gaza sektoryndaǵy atysty toqtatý týraly kelisimniń sońǵy jobasyn usyndy
ASTANA. KAZINFORM – Bul týraly Kazinform agenttiginiń menshikti tilshisi Reuters aqparaty boıynsha kelissózderdiń barysy týraly habary bar sheneýnikke silteme jasap habarlaıdy.
Onyń aıtýynsha, tún ortasynan keıin Dohada Izraıl kelissózder toby, AQSh-tyń jańa saılanǵan prezıdenti Donald Tramptyń Taıaý Shyǵystaǵy arnaıy ókili jáne Qatardyń premer-mınıstri arasyndaǵy kelissózder boıynsha serpilis boldy.
The Times of Israel-diń habarlaýynsha, Izraıl sheneýnikteri túnde serpilis bolǵanyn jáne HAMAS maquldaǵan jaǵdaıda kelisim jaqyn arada jasalady.
Izraıldiń 12-shi arnasynyń reportajyna sáıkes, kepilge alynǵan adamdardy bosatý, yqtımal atysty toqtatý týraly kelisimniń egjeı-tegjeıi kelisilgen, deldaldar Palestına tobynyń túpkilikti maquldaýyn kútip otyr.
Associated Press agenttiginiń habarlaýynsha, halyqaralyq deldaldar bir túnde kelisimge qol qoıý jolynda aıtarlyqtaı jetistikke jetken, degenmen sheneýnikter resmı túrde kelisimge áli qol qoımaǵan.
Úsh sheneýnik anonımdi túrde qol jetkizilgen progresti moıyndaıdy jáne aldaǵy kúnderi 15 aılyq áskerı qımyldardy toqtatý úshin óte mańyzdy bolady dep sanaıdy. Sol sııaqty atalǵan úsh sheneýniktiń biri jáne HAMAS ókili áli de birqatar kedergini jeńý kerek deıdi.
Sonymen qatar HAMAS ókili taǵy birqatar daýly máseleni sheshýdi talap etedi, sonyń ishinde Izraıldiń soǵysty toqtatý mindettemesi jáne Izraıl áskerleriniń shyǵarylýy men kepilge alynǵan adamdardy palestınalyq tutqyndarǵa aıyrbastaýdyń egjeı-tegjeıin sheshýdi talap etip otyr.
Deldaldardyń bitim jasaýdaǵy qadamdary
Halyqaralyq deldaldar — Qatar, Egıpet jáne AQSh 20 qańtarda saılanǵan prezıdent Donald Tramp qyzmetke kiriskenge deıin otarlaǵan aýmaqtarda áskerı qımyldardy toqtatý jáne kepilge alynǵan qalǵan adamdardy bosatý týraly kelisimge kelý úshin kúsh salýda.
AQSh prezıdenti Djo Baıden jeksenbide Izraıl premer-mınıstri Benıamın Netanıahýmen áńgimelesti. Izraıl premerimen telefon arqyly sóılesken kezde ol atysty dereý toqtatýǵa shaqyrdy.
Jeksenbide Izraıl premer-mınıstriniń baspasóz hatshysy Benıamına Netanıahý Izraıldiń qaýipsizdik jónindegi joǵary laýazymdy delegatsııasy kelissózderge qatysý úshin Qatarǵa kelgenin habarlady. Delegatsııa quramyna «Mossad» basshysy Devıd Barnea, «Shın Bet» ishki qaýipsizdik qyzmetiniń basshysy Ronen Bar jáne kepilge alý jónindegi áskerı tergeý komıtetiniń basshysy Nıtsan Alon kirdi.
Tramptyń Taıaý Shyǵystaǵy arnaıy ókili Stıv Vıtkoff sońǵy kúnderi Qatar premer-mınıstri sheıh Muhammed ben Abdýlrahman Al Tanımen jáne Netanıahýmen kezdesýler ótkizdi.
Beısenbiden bastap Izraıl men Palestına sheneýnikteri Izraıl men HAMAS toby arasyndaǵy janama kelissózderde belgili bir deńgeıge qol jetkizilgenin, biraq kelissózdiń egjeı-tegjeıi aıtylmaǵanyn habarlady. Taraptar kelisimniń sharttaryn óte qupııa ustaıdy.
Ázirge taraptardyń osyǵan deıin ekijaqty sheshilmeı kele jatqan kelispeýshilikterdi qalaı retteıtini belgisiz, aıtar bolsaq, HAMAS soǵysty toqtatýdy talap etedi, al HAMAS Gaza sektorynda bılik júrgizip, ızraıldikterge qaýip tóndirgen kezde Izraıl soǵysty toqtatpaıtynyn aıtady.