Qatar-2022: Messı Argentınany pleı-offqa shyǵara ala ma

ASTANA. QazAqparat – Qatarda ótip jatqan fýtboldan 2022 jylǵy álem chempıonatynda 30 qarasha kúni S tobynda úshinshi týr oıyndary bastalady, dep habarlaıdy QazAqparat tilshisi.

Atalǵan toptaǵy eki oıyn da elorda ýaqytymen 1:00-de bastalady.

Bul toptaǵy barlyq quramanyń jarysty jalǵastyrýyna múmkindigi bar. Eki týrdan keıin Polshada - 4, Argentınada - 3, Saýd Arabııasynda - 2, Meksıkada - 1 upaı.

Polsha men Argentına oıyny «Qazaqstan» telearnasynan tikeleı efırde kórsetiledi.

Kezdesý el astanasy Doha qalasyndaǵy 44 089 jankúıerge arnalǵan «Stedıým 974» stadıonynda ótkiziledi. Bas tóreshi – Dannı Makkelı.

FIFA reıtınginde Polsha - 26, Argentına 3-orynda tur.

Eki qurama buǵan deıin 11 márte kezdesti. Onyń 3-eýi Polshanyń, 6-aýy Argentınanyń basymdyǵymen aıaqtalsa, 2 kezdesý teń qorytyndylandy.

Saýd Arabııasy men Meksıka oıyny da «Qazsport» telearnasynan tikeleı efırde kórsetiledi.

Oıyn Lýsaıl qalasyndaǵy 88 966 jankúıerge arnalǵan «Lýsaıl Aıkonık» stadıonynda ótkiziledi. Bas tóreshi – anglııalyq Maıkl Olıver.

FIFA reıtınginde Saýd Arabııasy - 51, Meksıka 13-orynda tur.

Eki qurama buǵan deıin 5 márte kezdesti. Onyń birinde teń nátıje tirkelse, qalǵanynda meksıkalyq fýtbolshylar basym tústi.

Eske salsaq, Nıderland birinshi orynmen pleı-off satysyna shyqty.

Foto: cdn.vox-cdn.com