Qatar-2022: Anglııa 1/8 fınalda Senegalmen kezdesedi

ASTANA. QazAqparat - Fýtboldan Qatarda ótip jatqan álem chempıonaty toptyq kezeńinde V tobynda Anglııa birinshi oryn aldy, dep habarlaıdy QazAqparat tilshisi.

Atalǵan topta barlyq quramanyń da jarysty jalǵastyrý múmkindigi boldy. Sondyqtan pleı-off satysyna beriletin eki joldama taǵdyry úshinshi týrda sheshiletin edi.

Árıne, alǵashqy eki týrda nebári bir upaı jınaǵan Ýels fýtbolshylary úshin Anglııadan upaı oljalaý qıyn ekeni belgili. Eki qurama buǵan deıin 103 márte kezdesti. Onyń 14-de Ýels, 68-de Anglııa jeńiske jetse, qalǵanynda teń nátıje tirkeldi.

Aǵylshyn fýtbolshylary oıyn tizginin óz qolyna alýǵa tyrysty. Dese de Garet Beıl bastaǵan ýelstik qurama olardyń yńǵaıyna jyǵyla qoıǵan joq. Nátıjesinde birinshi kezeńde tablodaǵy esep ózgerissiz qaldy.

Ekinshi kezeńde aǵylshyndyq fýtbolshylar qarqyndy oıynymen kózge tústi. Olardyń qatarynan Markýs Rashford 50, 68, Fıl Foden 52-mınýttarda mergendik tanytty.

Osylaısha Anglııa qarsylasynan 3:0 esebimen basym túsip, jarystyń pleı-off satysyna shyqty.

Endi olar A tobynda ekinshi oryn alǵan Senegal quramasymen 4 jeltoqsanda 1/8 fınalda sheberlik baıqasady.

Aǵylshyn fýtbolshylary dúbirli dodada bıyl 11 márte baq synaýda. 1966 jyly chempıon atansa, odan keıin 1990, 2018 jyldarda tórtinshi orynǵa turaqtady.

Aıta ketsek, buǵan deıin jarystyń 1/8 fınalyna Frantsııa, Brazılııa, Portýgalııa, Nıderland, Senegal quramalary joldama aldy.

Endi 30 qarashada S jáne D tobyndaǵy quramalar úshinshi týr oıyndaryn ótkizedi.