Katalın Predoıý Rýmynııa premer-mınıstri bolyp taǵaıyndaldy

ASTANA. KAZINFORM — Rýmynııanyń ýaqytsha prezıdenti Ilıe Bolojan aldyńǵy úkimet basshysy otstavkaǵa ketkennen keıin Katalın Predoıýdy premer-mınıstr etip taǵaıyndady, dep habarlaıdy Euronews.

Ulttyq lıberaldyq partııanyń múshesi Predoıý ýaqytsha úkimetti 45 kún basqarady, degenmen onyń ókilettigi shekteýli bolady.

Marchel Cholaký dúısenbide bıliktegi koalıtsııa kandıdaty qaıta ótken prezıdenttik saılaýdyń ekinshi týryna óte almaǵan soń otstavkaǵa ketti. Krın Antoneský jeksenbide úshinshi oryn alyp, ultshyl Djordje Sımıon men Býharesttiń batysshyl meri, táýelsiz kandıdat Nıkýshor Danǵa jol berdi.

Rýmynııada birneshe aı buryn sheteldik aralasýdyń aıyptaýlaryna baılanysty Konstıtýtsııalyq sot aldyńǵy saılaý nátıjelerin jaramsyz dep tanyǵannan keıin qaıta prezıdenttik saılaý ótti. Bul buryn-sońdy bolmaǵan sheshim Rýmynııany sońǵy onjyldyqtardaǵy eń aýyr saıası daǵdarysqa ushyratty.

Jeksenbidegi daýys berý Eýropalyq Odaq pen NATO-ǵa múshe osy eldi qamtyǵan saıası belgisizdikti kúsheıtti.

EO-nyń kóptegen elindegideı, Rýmynııada joǵary ınflıatsııa, bıýdjet tapshylyǵy jáne baıaý ekonomıka qozdyratyn ısteblıshmentke qarsy kóńil-kúı ornady.

Baqylaýshylardyń aıtýynsha, bul jaramsyz dep tanylǵan prezıdenttik saılaýdyń birinshi týrynda jeńiske jetken Kelın Djordjeský sııaqty ultshyl jáne ásire ońshyl qaıratkerlerge qoldaýdy kúsheıtti. Oǵan qatysty áli de tergeý júrip jatyr jáne qaıta daýys berý rásimine qatysýǵa tyıym salynǵan.

Jeksenbidegi daýys berýdiń jeńimpazy, 38 jastaǵy AUR partııasynyń jetekshisi Djordje Sımıon 18 mamyrda ótetin ekinshi týrda Nıkýshor Danmen kezdesedi.

Buǵan deıin Rýmynııadaǵy prezıdentti saılaýda ásire ońshyl saıasatker Djordj Sımıon alda kele jatqanyn jazǵan edik.