Qasym-Jomart Toqaev Prezıdent saılaýy naýqanyna qatysty pikir bildirdi

PAVLODAR. QazAqparat – Memleket basshysy Qasym-Jomart Toqaev búgin Pavlodar oblysynyń jurtshylyǵymen kezdesýi barysynda Prezıdent saılaýy naýqanyna qatysty pikir bildirdi, dep habarlaıdy QazAqparat BORT№1 Telegram kanalyna silteme jasap.

«Prezıdent saılaýy jarııalanǵannan keıin daıyndyqqa jetkilikti ýaqyt ótti. Búginde saılaý naýqany qarqyn alǵanyn kórip otyrmyz. Úmitkerler usynylyp, partııalar men qoǵamdyq qozǵalystar belsendilik tanytyp jatyr. Іshki saıası ómirdiń jandanǵany kórinip tur.

Biz barlyq negizgi saıası ınstıtýttardy jańǵyrtatyn jańa elektoraldy kezeńge qadam bastyq. Ózderińizge málim, men elimizdegi eń iri AMANAT partııasynyń Tóraǵasy qyzmetinen bas tarttym. Konstıtýtsııalyq reforma nátıjesinde Prezıdentke óz ókilettigin atqarý kezinde partııa qatarynda bolýǵa tyıym salyndy»,-dedi Memleket basshysy.