Qasym-Jomart Toqaev: Qazaqtyń tili - qazaqtyń jany!
Suhbat barysynda Prezıdentke memlekettik tildi damytý úshin qandaı sharalar atqarylý kerektigi týraly suraq qoıylǵan bolatyn.
«Qazaqtyń tili - qazaqtyń jany! Halqymyzdyń tarıhy da, taǵdyry da - tilinde. Mádenıeti men ádebıeti de, dili men dini de - tilinde. V.Radlov aıtqandaı, qazaq tili - eń taza ári baı tildiń biri. Til ótken tarıhpen ǵana emes, búgin men bolashaqty baılanystyratyn qural. Menińshe, tildiń tuǵyry da, taǵdyry da besikten, otbasynan bastalady. Otbasynda ana tilinde sóılep ósken búldirshinniń tilge degen yqylasy tereń, qurmeti bıik bolady. Osy turǵyda, balabaqshalarda, mektepterde memlekettik tildiń mártebesin kóterýdi nazarda ustaý qajet. Biz memlekettik tildiń mártebesin kóterý baǵytyndaǵy jumystardy úzdiksiz jalǵastyra beremiz», - dedi Qasym-Jomart Toqaev.
Budan bólek, suhbat barysynda latyn grafıkasyna kóshýdiń aldaǵy qadamyna da nazar aýdaryldy. Bul rette Prezıdent kez kelgen ulttyń álipbı tańdaýy tek jazý úlgisin tańdaý emes ekenin atap ótti.
«Búginde Qazaqstan halqy da zamana kóshinen qalmaı, latyn grafıkasyna negizdelgen álipbıdi tańdaýǵa bel býyp otyr. Kórshi memleketterdiń kópshiligi latyn grafıkasyn tańdady. Álemdegi aqparattardyń 90 paıyzy latyn grafıkasynda jaryq kóredi. Al aqparatqa kim ıelik etse, ǵylym men tehnologııaǵa da sol ıe bolady. Qazaq tiliniń latyn álipbıine kóshýi - rýhanı jańǵyrýdyń eń sheshýshi kezeńderiniń biri. Bul qoǵamdyq oı men sanaǵa túpkilikti ózgeris jasaıtyn qadam», - dedi Memleket basshysy.
Prezıdenttiń aıtýynsha, latyn álipbıine kóshý kezeń-kezeńimen jalǵasa beredi. «Naqty belgilengen keste bar. Sol júıeden aýytqymaımyz. Biraq, qoǵamdyq pikir, álipbıdi qoldaný barysyndaǵy artyqshylyqtar men olqylyqtar eskeriledi», - dedi Qasym-Jomart Toqaev.
