Qasym-Jomart Toqaev Eýroparlamenttiń Qazaqstan týraly qararyna pikir bildirdi
Suhbat júrgizýshisi Prezıdentten bul qujat pen jalpy Eýroparlament ınstıtýtyna kózqarasyn surady.
«Instıtýt retinde Eýropa Parlamentine ratsıonaldy túrde qaraımyn deýge bolady. Óıtkeni ınstıtýttyń ózi bar. Eger adamdar oǵan múshe memleketterdiń qansha qarjy tóleıtinin bilse, bul ınstıtýtqa synı kózqaras basym bolar edi. Biraq qandaı jaǵdaı bolsa da, pikir bildirgim kelmeıdi, óıtkeni bul Eýropalyq Odaqtyń sharýasy. Eger olar mundaı ınstıtýtty osynsha qarajatqa ustap turý kerek dep sanasa, marhabat», - dedi Qasym-Jomart Toqaev.
Prezıdent bul qarardyń esh mindetti emes, usynymdyq sıpatta ǵana ekenin eske saldy.
«Olar Qazaqstan boıynsha ekinshi ret qarar qabyldady, bul joly esh ádiletsiz, aldyn ala qabyldap otyr. Sondyqtan meniń bul sheshimge degen kózqarasym jaıbaraqat», - dedi Q. Toqaev.
Eske sala ketsek, Frantsııanyń Strasbýrg qalasynda Eýropa Parlamentiniń bıylǵy alǵashqy plenarlyq otyrysy ótip, onda Qazaqstandaǵy qańtar oqıǵalary talqylandy. Jıynnan keıin arnaıy qarar qabyldandy. Qazaqstannyń Syrtqy ister mınıstrligi Eýroparlamenttiń elimizdegi jaǵdaıǵa qatysty qabyldaǵan qarary birjaqty sıpatqa ıe ekenin jáne obektıvti emes tujyrymdarǵa negizdelgenin málimdedi.
Sonymen birge, Prezıdent Qazaqstandaǵy oqıǵalarǵa halyqaralyq tergeý júrgizý usynysyn qoldamaıtynyn aıtty.
«Qazaqstandaǵy oqıǵalarǵa halyqaralyq tergeý júrgizýge kelsek, men mundaı tergeýdi júrgizý qajet dep sanamaımyn. Ózimizdiń de shamamyz jetedi. Bizde ádil, obektıvti adamdar bar. Búgin de qoǵamdyq komıssııalardy basqaratyn keıbiriniń esimin atadym. Men de, meniń ákimshiligim de bul komıssııalardy qurýǵa qatysqan joqpyz. Olardyń ózderi osyndaı ınstıtýttar qurýǵa sheshim qabyldady. Olar jumys isteı bersin. Óıtkeni men de aqıqatty, shyndyqty bilýge múddelimin», - dedi Prezıdent.
