Kásiporyndar otandyq metaldy álemdik baǵadan 5% arzanǵa ala alady

ASTANA. KAZINFORM – Otandyq kásiporyndar elimizde óndirilgen birqatar metaldy álemdik baǵadan arzanǵa satyp ala alady. Bul týraly QR Ónerkásip jáne qurylys mınıstrliginiń Ónerkásip komıteti tóraǵasynyń orynbasary Ǵalymjan Tórebek aıtty. 

– Memleket basshysynyń Joldaýynda qoıǵan strategııalyq mindetterdiń biri – otandyq óńdeý ónerkásipterin damytý, olardy otandyq shıkizatpen qamtamasyz etý. 2021 jyly ishki taýar óndirýshilerdi shıkizatpen qamtamasyz etý boıynsha «Ónerkásiptik saıasat týraly» QR Zańy qabyldandy. 2024 jyly osy zańǵa tolyqtyrý engizildi. Osy Zańnyń negizinde otandyq kásiporyndar shıkizatty londondyq metall bırjasy baǵasynan 5% tómendetip alady, - dedi ol OKQ alańynda. 

Onyń aıtýynsha, jańa zań normasy qabyldanǵan soń alıýmınııdi ishki óńdeý 2 ese artqan. Sondaı-aq 2029 jylǵa qaraı alıýmınııdi qaıta óńdeýdi 163 myń tonnaǵa deıin ulǵaıtý kózdelip otyr. 

Sondaı-aq spıker otandyń óńdeýshilerge qorǵasynnyń tonnasy londondyq metall bırjasynan 40 dollarǵa deıin tómen beriletinin atap ótti. 

Eske sala ketsek, 2024 jyly Qazaqstannyń shıkizattyq emes ónimderi arasynda eksporttyń eń joǵary ósimin metallýrgııa salasy kórsetti.