Kásipkerlerdi qoldaý: «Damý» qorynda qansha qarajat bar
ASTANA. KAZINFORM – «Damý» kásipkerlikti damytý qory – otandyq kásipkerlerge qoldaý kórsetetin jalǵyz memlekettik operator. Qordyń qyzmeti týraly basqarma tóraǵasy Farhat Sársekeev aıtyp berdi.
- Qazir biz qorda 35 mlrd teńge jınap otyrmyz. Búginde 9 bank usynys berip, 10 mlrd teńge qarjy quıdy. Buryn kásipkerler nesıeni bankten alady, sosyn bizge kelip kepildik alatyn. Qaǵazbastylyq bolatyn, eki mekemege barý qajet edi. Biz banktermen birlesip qor qurǵandyqtan, tolyq sheshimdi bank qabyldaıdy, bank kepildik beredi, bizge kelmeı-aq qoısańyz bolady, - dedi Farhat Sársekeev Jibek joly telearnasynyń «Ýáde» baǵdarlamasyna bergen suhbatynda.
Odan ári basqarma tóraǵa qazaqstandyq kásipkerlerge ýáde berdi.
- Kásipkerlik baǵytyn ári qaraı damytýǵa bar kúshimdi, tájirıbemdi salýǵa ýáde beremin. «Damý» qory kásipkerlermen de, banktermen de, Úkimetpen de jumys isteıdi. Bul sekildi memlekette basqa qor joq. Halyqaralyq tájirıbeni paıdalanyp shaǵyn jáne orta bızneske qolymnan kelgenshe úles qosýǵa ýáde beremin, - dep túıindedi qor basshysy.
Shaǵyn kásip ashqan jandar jeńildetilgen nesıe, sýbsıdııa tetikterin qarastyratyny belgili. Osy oraıda bıznes jospar quryp, jeńil nesıe alýǵa qoldaý kórsetetin qyzmet túri paıda bolǵan. Osy tusta kásipti endi qolǵa alǵan jandarǵa eskertý jasaldy.