Kásipkerler sý tasqynymen kúreske qarjylaı kómek kórsetýdi jalǵastyrýda

ASTANA. KAZINFORM – Elimizdiń dáýletti azamattary men iri kompanııalar sý tasqynynan zardap shekken jandarǵa kómek retinde áli de aýqymdy qarjy aýdaryp jatyr.

Búgin BI Group kompanııasy sý basqan óńirlerdegi turǵyn úılerdi qalpyna keltirýge 5 mlrd teńge bóletini belgili boldy.

«Tabıǵat apatynan zardap shekken otandastarymyzdyń jaǵdaıy bizdi beı-jaı qaldyra almaıdy. Sý tasqynynyń alǵashqy kúnderinen bastap BI Group shuǵyl qajettilik úshin óńirlerge 500 mıllıon teńge aýdaryp, jergilikti bılik organdaryna, adamı resýrstar, qurylys jáne arnaıy tehnıka bóldi. Sý tasqynynyń saldaryn eskere otyryp, biz qarjylyq kómekti 5 mlrd teńgege deıin ulǵaıtý týraly sheshim qabyldadyq», - dedi kompanııa basshysy Aıdyn Rahymbaev.

Keńes Raqyshev pen Ásel Tasmaǵambetova sý tasqynynan zardap shekkenderge kómek retinde 1,2 mlrd teńge jiberdi.

Qazaqstandyq kásipker Keńes Raqyshev pen «Sábı» qaıyrymdylyq qorynyń prezıdenti Ásel Tasmaǵambetova 20 jyldan astam ýaqyt júıeli jáne turaqty negizde qaıyrymdylyq sharalaryn ótkizip keledi. El óńirlerinde mektepter men áleýmettik mekemelerdi, balalarǵa arnalǵan oıyn qalashyqtary men sport alańdaryn, robototehnıka ortalyqtaryn jáne joǵary tehnologııalyq quraldarmen jabdyqtalǵan aýrýhanalardy salýǵa úles qosýda.

Elimizdiń kóptegen óńiri sý tasqyny aımaǵynda qalyp, halyq zardap shekkenderge kómek kórsetý úshin bas qosqan osy qıyn kezeńde Qazaqstan Prezıdenti Qasym-Jomart Toqaev belgilegen vektor boıynsha metsenattar da shet qalmaı, sý tasqynynan zardap shekken áleýmettik nysandardy qalpyna keltirýge 1 mlrd teńge aýdardy.

«Tabıǵı apatqa tap bolǵan qazaqstandyqtarǵa qoldaý bildiremiz. Bir elde turyp jatqan soń qaıǵymyz da ortaq. Meniń týǵan jerim Atyraý oblysynyń aýdandaryn da sý basty. Jaǵdaıdy udaıy baqylap, apattyń aýqymyn túsine otyryp, sý tasqynynan zardap shekken óńirlerdiń áleýmettik ınfraqurylymyn qalpyna keltirýge 1,2 mıllıard teńge bólý týraly sheshim qabyldadyq», - delingen habarlamada.

Sondaı-aq, Shoqan Ýálıhanov atyndaǵy jeke mekteptiń oqýshylary qaıyrymdylyq jármeńke ótkizip 9 mıllıon teńge jınaǵan.

«Jumyla kótergen júk jeńil demekshi, biz ortaq kúsh-jigermen qıyn jaǵdaıdy eńseretinimizge senemiz. Tabıǵat apatynyń beti qaıtyp, jańa úıler boı kóterip, elimiz budan ári nyǵaıyp, birligi arta túsetinine shyn júrekten senemiz», - deıdi «Sábı» qaıyrymdylyq qorynyń prezıdenti Ásel Tasmaǵambetova.

Kásipker Baharıdın Ablazımov jáne onyń kompanııalar toby sý tasqynynan zardap shekken Qazaqstannyń birqatar óńirine 2,7 mıllıard teńge bóledi. Qarajat zardap shekken aımaqtardaǵy mańyzdy ınfraqurylymdy qalpyna keltirýge, jańa úıler satyp alýǵa jáne salýǵa baǵyttalady.

Kómekti durys paıdalaný maqsatynda qarajat «Demeý Qazaqstan» qorynyń arnaıy shotyna aýdarylmaq.

Bıyl naýryz aıynan bastap «QazAzot» AQ, «Maten Petroleým» AQ kompanııalar toby 100 mıllıon teńgeden astam qarajat bóldi. Onyń ishinde 70 mıllıon teńge materıal jáne gýmanıtarlyq kómek túrinde kórsetildi.

Sondaı-aq, sý basqan óńirlerge barǵan eriktilerdiń shyǵynyn óteýge 30 mıllıon teńgeden astam qarajat jiberildi.

«Biz sý tasqynynan zardap shekken óńirlerge alǵashqy kúnnen bastap kómek kórsetip kelemiz. Men bul synaqty birlik pen uıymshyldyqtyń arqasynda jeńetinimizge senimdimin», - deıdi kásipker.

Sondaı-aq, búgin Álıdar Ótemuratovtyń sý tasqynynan zardap shekken óńirlerdiń biri Aqtóbe oblysyna 500 mıllıon teńge bólgeni málim etildi. Qarajat sý tasqynynan zardap shekken adamdarǵa páterler satyp alýǵa jáne úıler salýǵa jumsalady.

«Qıyn jaǵdaıda memleket, bıznes jáne azamattyq qoǵam resýrstaryn biriktirý - tabıǵı apat saldarymen kúresýdiń kilti. Sý basqan óńirlerdegi máselelerdi sheshýge qatysty jyldam ári tıimdi sharalar - turǵyndardyń endigi jaǵdaıy men ekologııalyq apattyń aldyn alýdyń kepili», - dedi Álıdar Ótemuratov.

Buǵan deıin qazaqstandyq mıllıarderler Memleket basshysy Qasym-Jomart Toqaevtyń úndeýine qulap asyp, sý tasqynynan zardap shekkenderge kómek, qoldaý retinde iri kólemde qarjy bólgeni týraly habarlaǵan edik.

Eske sala keteıik, Prezıdent Forbes tizimine kiretin iri kásipkerler ár oblysqa, aýdanǵa, eldi mekenge bekitiletini týraly aıtqan edi.

Maqsat – tasqyn sýdyń zardabyn tartqan adamdarǵa qol ushyn sozý.

Kazinform agenttigi tasqyn sý saldaryn joıýǵa Forbes tizimindegi baı-manaptardan kimder tartylatyndyǵyna sholý jasady.