Kaspııde joǵalǵan mańǵystaýlyq eki balyqshy tabylmaı jatyr

AQTAÝ. KAZINFORM - Mańǵystaý oblysynda Kaspıı teńizine balyq aýlaýǵa shyqqan eki turǵyn on kúnge jýyq ýaqyttan beri tabylmaı jatyr.

3 sáýirden beri izdeýge alynǵan Túpqaraǵan aýdanynyń eki balyqshysyn izdeý jumystary jalǵasyp jatqanymen, nátıje joq.

Mańǵystaý oblysynyń Tótenshe jaǵdaılar departamenti Tótenshe jaǵdaılardy joıý basqarmasy bastyǵynyń mindetin atqarýshy azamattyq qorǵaý aǵa leıtenanty Dinmuhammed Pirimjannyń sózinshe, ázirge eki adamǵa qatysty izdeý kezinde nátıje bolmaı otyr.

"3 sáýir kúni tańerteńgi saǵat 07:40 shamasynda Fort-Shevchenko qalasynan Qyzyl Ózen aýyly baǵytyna qaraı Úrdek teńiz jaǵasynan shamamen 25-30 shaqyrym qashyqtyqta eki er adam balyq aýlaýǵa shyqqan. 1985 jáne 1982 jyly týǵan turǵyndar 2 sáýir kúni saǵat 22:30 shamasynda úrmeli qaıyqpen balyq aýlaýǵa ketkeni belgili boldy. Alaıda olar qaıta oralmaǵan. Anyqtalǵan aqparat boıynsha olarda balyq aýlaý tory bolǵan. Shaqyrtý túsken sátten bastap izdestirý-qutqarý jumystary bastaldy. Alaıda áli kúnge deıin izdestirý-qutqarý jumystary nátıje bergen joq", - dedi Dinmuhammed Pirimjan.

Onyń sózinshe, eki balyqshynyń naqty qaı jermen júrgenin anyqtaý múmkin bolmaǵan.

"Sebebi eki azamattyń qaı jerden qaı baǵytqa qaraı shyqqany túsiniksiz bolyp otyr. Departamenttiń súńgýir qutqarýshylary týyndaǵan qıyndyqtarǵa qaramastan izdestirý-qutqarý jumystaryn júrgizýde. Búgingi kúni izdestirý-qutqarý jumystaryna Mańǵystaý oblysynyń Tótenshe jaǵdaılar departamenti jeke quramynan 44 adam, 6 birlik tehnıka, 7 birlik júzý quraly, 1 birlik ushqyshsyz ushý apparaty, UQK Shekara qyzmetinen 21 áskerı qyzmetker, 1 keme, «Qazavıaqutqarý» AQ 3 adam, 1 birlik Mı-8 tik ushaǵy jumyldyryldy", - dedi Dinmuhammed Pirimjan.

Buǵan deıin Mańǵystaýda Kaspıı teńizinde joǵalǵan eki balyqshy týraly oblystyq TJD ókilderi málimdegen bolatyn.

Sondaı-aq, Túpqaraǵan aýdany aýmaǵynda Kaspııde qyrylǵan ıtbalyqtar sany 100-den asyp jyǵyldy.