Kaspııde brakonerlik aýǵa túsken ıtbalyqtar men bekire tuqymdas balyqtar tabyldy
AQTAÝ. KAZINFORM — Ólgen sý janýarlaryn Gıdrobıologııa jáne ekologııa ınstıtýtynyń qyzmetkerleri anyqtaǵan. Sebebi, mamandar araldarda ıtbalyqtardy zertteý úshin ǵylymı ekspedıtsııa júrgizip jatqan bolatyn.
Olar brakonerlik aýdy ótken demalys kúni ıtbalyq araldarynan Fort-Shevchenko qalasyna qaıtyp kele jatyp, Qulaly aralynyń aýmaǵynan tapqan. Artynsha Mańǵystaý oblystyq balyq ınspektsııasyna habarlaǵan.
Túpqaraǵan aýdandyq balyq ınspektsııasy bóliminiń bas mamany Andreı Rýtskııdiń aıtýynsha, oqıǵa ornyna jergilikti ınspektorlar, shekarashylar jáne Atyraý óńirinen kelgen jedel top ókilderi «Bekire-2025» aýqymdy reıdtik sharasy aıasynda birge barǵan.
— Málimet rastaldy. Oqıǵa ornynan bekire tuqymdas balyqtardy aýlaýǵa salynǵan zańsyz aý shyǵaryldy. Oǵan eki ıtbalyq pen 5 bekire tuqymdas túsip, ólgen. Jartylaı buzylǵan. Biz olardy jaǵaǵa shyǵaryp, qylmystyq is qozǵaý úshin Túpqaraǵan aýdandyq polıtsııa bólimine tapsyrdyq, — deıdi Andreı Rýtskıı.
Buǵan deıin, Mańǵystaýda brakonerlerdiń aýyna túsken óli ıtbalyqtar tabylǵan edi.