Kaspııdi saqtaıyq: «Jańa adamdar» jastar qozǵalysy úndeý jasady
AQTAÝ. KAZINFORM – «Jańa adamdar» jastar qozǵalysy teńizdi qorǵaý maqsatynda jaǵalaýdaǵy elderge úndeý joldady. Bul týraly jastar qozǵalysynyń baspasóz qyzmeti málim etti.
— Kaspıı teńizi — joıylyp ketý qaýpinde tur. Sý aıdyny jyldam taıazdanyp barady, bul — tek bir eldiń ǵana máselesi emes, mıllıondaǵan adamnyń ómir saltyna áser etetin jahandyq ekologııalyq qaýip. Bul jaǵdaıdy tek birlesken kúsh-jiger arqyly ǵana túzetýge bolady, — delingen habarlamada.
Memleket basshysy Qasym-Jomart Toqaev birneshe ret atap ótkendeı, sóz — aımaqtyq másele týraly ǵana emes, bul — halyqaralyq qoǵamdastyq úshin dabyl qaǵarlyq jaǵdaı. Ony eńserý úshin júıeli qadamdar, úılestirilgen sheshimder men úkimet basshylary men salalyq bólimder deńgeıinde naqty sharalar qajet.
— Jańa adamdar, azamattyq qoǵamnyń bir bóligi retinde bul jaǵdaıǵa beıjaı qaraı almaıdy. Kaspııdiń taǵdyry — bizdiń sanaly áreketterimizdiń, ózimizge degen qurmetimizdiń jáne adam bolyp qalý qabiletimizdiń aınasy, — dep ún qatty.
Kaspııdiń jaǵalaýynda, Aqtaýda, júzdegen daýylpaz úni estildi, bul — teńiz taǵdyry eshkimdi beıjaı qaldyrmaıtynyna nazar aýdartý tásili. Qatysýshylar Kaspıı teńizin qorǵaý jáne qalpyna keltirý úshin kúsh biriktirýge shaqyrdy.
Belsendiler kókke uzyndyǵy 22 metrlik «Kaspııdi saqtaıyq» degen jazýy bar alyp batpyraýyqty kóterdi. Bul — keler urpaqqa jáne ózderine berilgen ýáde.
Qozǵalys Qazaqstan, Reseı, Ázerbaıjan, Iran jáne Túrikmenstan halqyna jáne saıasatkerlerge, bıznes ókilderine, korporatsııalarǵa, qorlarǵa úndeý jasady.
— Sóz tek tabıǵat jaıynda emes — erteńimiz úshin búgin ómir súrýdi tańdaıtyn shynaıylyq týraly. Kaspııdi saqtaý — ózimizdi jáne maqtanyshymyzdy saqtaý, — deıdi Jańa adamdar qozǵalysynyń ókilderi.
Eske sala keteıik, buǵan deıin elordada ótken ІІ Astana Think Tank Forum-2025 halyqaralyq forýmynda Syrtqy ister mınıstriniń birinshi orynbasary Erjan Ashyqbaev Aral men Kaspıı teńizderiniń ekologııalyq problemalaryn sheshýge halyqaralyq deńgeıde qatysýdy kúsheıtý qajet ekenin aıtqan bolatyn.