Kaspıı jaǵalaýynan taǵy da ıtbalyqtardyń óleksesi tabyldy
ASTANA. KAZINFORM — Aqtaýda Kaspıı teńiziniń jaǵalaýynan taǵy da qyrylǵan ıtbalyqtar tabylǵan. Ekologtar sý synamalaryn zertteý úshin shara qabyldaǵan. Ólekseniń sany áli naqtylanyp jatyr.
Atalǵan oqıǵa týraly Mańǵystaý oblystyq Ekologııa departamenti habarlady. Qyrylǵan ıtbalyqtardyń óleksesi 24 mamyr kúni 1B shaǵynaýdany mańyndaǵy «Shaǵala» demalys aımaǵy aýmaǵyndaǵy jaǵalaý syzyǵynan tabylǵan.
Ólekselerdiń naqty sany ázirge jarııa etilmedi.
Aıta keteıik, buǵan deıin Aýyl sharýashylyǵy mınıstrliginiń Balyq sharýashylyǵy komıteti 19 mamyrda Kaspıı teńiziniń jaǵalaýynan tabylǵan óli ıtbalyqtar týraly aqparatqa túsinik bergen bolatyn.
Sol joly Túpqaraǵan aýdanyndaǵy Kaspıı teńizi jaǵalaýynda monıtorıng júrgizý barysynda jaǵalaýda qatty ydyraǵan (2-4 kezeń) 35 ıtbalyqtyń óleksesin anyqtalǵan edi.
Ekologtar sol joly ıtbalyqtardyń jaǵaǵa shyǵarylýy batystan soqqan kúshti daýyldyń saldarynan bolyp turatynyn, degenmen, barlyq ıtbalyqtardyń ólimi bir ýaqytta bolýy múmkin ekenin túsindirgen. Kaspıı ıtbalyǵyn zertteýdi júzege asyratyn ǵylymı uıym (Gıdrobıologııa jáne ekologııa ınstıtýty) synamalardy (tis, jún jáne tyrnaq) alǵany habarlandy.
