Kaspıı teńiziniń soltústik bóliginde jańa aral paıda boldy
ATYRAÝ. KAZINFORM – Tabıǵat qorǵaýshylar birneshe jyldan beri 5 elge ortaq Kaspıı teńiziniń taıyzdanýyna baılanysty dabyl qaǵyp keledi. Al jaqynda sý aıdynynyń soltúsik bóligine taıaý mańnan araldyń paıda bolǵany habarlandy.
Bul týraly Reseı ǵylym akademııasynyń P.Shırshov atyndaǵy muhıttaný ınstıtýtynyń ǵalymdary aqparat taratty.
Ǵalymdar arnaıy ekspedıtsııasy kezinde Soltústik Kaspııde jańa araldyń paıda bolǵanyna kóz jetkizgen. Ol Malyı Jemchýjnyı aralynan ońtústik-batysqa qaraı 30 shaqyrym jerde ornalasqan.
– Kaspıı teńizinde jańa aral tabyldy. Bul – Kaspıı teńiziniń taıyzdanýynyń taǵy bir dáleli. 2024 jyldyń qarashasynda túsirilgen spýtnıktik sýretterde «Srednıaıa Jemchýjnaıa» jaǵalaýynyń qurǵaǵany baıqaldy. Bul teńiz deńgeıiniń tómendeýine baılanysty paıda bolǵan jańa jer ekenin rastaý endi ǵana múmkin boldy, - delingen aqparatta.
Ekspedıtsııa músheleri áýe kemesimen aralǵa jaqyndaǵan. Alaıda, sýdyń taıazdyǵy men qıyn aýa raıynyń qubylýyna baılanysty qona almaǵan. Al, kvadrokoptermen túsirilgen fotosýretterden araldyń sulbasy anyq kórinedi.
– Ǵalymdar bıogıdrohımııa, gıdrobıologııa jáne teńizdegi qubylý dınamıkasyna qosymsha zertteýler júrgizý úshin araldyń mańyndaǵy soltústik taıaz sýda shamamen 0,4 m tereńdikte arnaıy stantsııa qurdy. Qazir aral sýdan sál ǵana joǵary kóterilip tur. Biraq, teńiz sýynyń eń tómengi deńgeıinde aıtarlyqtaı baıqalady. Betkeıi qumdy jotalary bar tegis, ylǵaldy, ári jazyq. Jaqyn arada ǵalymdar jańa araldyń bastapqy sıpattamasyn aıaqtap, onyń geografııalyq ataýyna qatysty usynystaryn ortaǵa salady, - dep naqtylaǵan reseılik ǵalymdar.
Ǵalymdardyń pikirinshe, Kaspıı teńiziniń deńgeıi tómendeı berse, aral aýmaǵy keńeıýi múmkin. Sóıtip, sırek kezdesetin qustar men Kaspıı ıtbalyǵynyń jańa mekenine aınalatyna boljam jasalyp otyr.
Eske sala ketelik, budan buryn Sáýirde Kaspıı teńiziniń 3 eldegi sektorynda 15 daq anyqtalǵanyn jazǵan edik.