Kaspi Profit-ke sengen aqtóbelik dáriger 46 mln teńgesinen aıyryldy
AQTÓBE. KAZINFORM – Aqtóbelik dáriger «Kaspi Profit» platformasynyń jalǵan paraqshasyna senip, kezeń-kezeńimen 46 mln teńge aqsha aýdarǵan. Ol ınvestıtsııa salyp, qarjyny eselemek bolyp, barynan aıyryldy.
Aqtóbe oblystyq PD baspasóz qyzmetiniń habarlaýynsha, alaıaqtar Instagram áleýmettik jelisi arqyly «Kaspi Profit» platformasyn jarnamalaıdy. Tipti tanymal bank ıesiniń atyn jamylyp, azamattardy aqshany ınvestıtsııalaýǵa shaqyrǵan.
- Aqtóbelik dáriger áıel jarnama boıynsha habarlasyp, ózin «Kaspi Profit» menedjeri jáne qarjy taldaýshysy retinde tanystyrǵan adammen Telegram messendjeri arqyly sóılesken. Jalǵan menedjer oǵan «RoseFinance» krıpto platformasyna aqsha qarajatyn salý jáne odan ári joǵary paıyzben qarjy qaıtarýǵa keńes beredi. Alaıaqqa sengen dáriger qańtar-sáýir aılary aralyǵynda 46 mıllıon teńgeden astam aqsha aýdarǵan. Alaıda ýáde etken joǵary paıyzdy da, óz aqshasyn ala almaǵan áıel aldanǵanyn túsinip, polıtsııaǵa aryzdandy, - dep habarlady oblystyq PD baspasóz qyzmetiniń jetekshisi Erbolat Sarqulov.
Qazirgi kezde tergeý júrip jatyr.
