Kásiptik biliktilikterdi taný júrgiziletin kásipter tizbesi qalyptastyrylady
«Zań jobalary biliktilikti taný ortalyqtaryn damytýǵa serpin beredi jáne qyzmetkerlerdi ómir boıy quzyrettilikterin jetildirýge yntalandyratyn bolady. Sondaı-aq, zań jobasynda kásiptik biliktilikterdi taný júrgiziletin kásipter tizbesin qalyptastyrý kózdeledi», - dedi ol Májiliste «Kásiptik biliktilik týraly» jáne «Qazaqstan Respýblıkasynyń keıbir zańnamalyq aktilerine kásiptik biliktilik máseleleri boıynsha ózgerister men tolyqtyrýlar engizý týraly» zań jobalaryn tanystyra kele.
Onyń atap ótýinshe, tizilimdi júrgizýdi Eńbek mınıstrliginiń Ulttyq biliktilik júıesiniń tsıfrlyq platformasynda júzege asyrý josparlanǵan: Al tizilimge engizý úshin usynystardy memlekettik organdar men salalyq keńester engizetin bolady.
«Dárigerler, qarjy aýdıtorlary jáne basqalary sııaqty retteletin mamandyqtar boıynsha kásibı qyzmetti sertıfıkatsyz júzege asyrý múmkindigi shekteletinin atap ótken jón. Basqa mamandyqtar boıynsha túlekter men qyzmetkerler jumys berýshiler tarapynan úlken suranysqa ıe bolý úshin óz biliktilikterin óz erkimen rastaı alady», – dedi Oljas Ordabaev.
Vıtse-mınıstrdiń aıtýynsha, zań jobalary qyzmetkerler men jumys berýshilerdi kásiptik biliktilikti taný júıesine enýdi yntalandyrý boıynsha birqatar is-sharalardy qarastyrady. Mysaly, bul - qyzmetkerler úshin túrli kepildikter men jeńildikterdi engizý nemese biliktilikti tanýdyń vaýcherlik-modýldik júıesi.
«Zań jobalaryn qabyldaý azamattardy biliktilik deńgeıin arttyrýǵa jáne daǵdylar men quzyretterdi damytýǵa yntalandyrýǵa múmkindik beredi. Jumys berýshiler qyzmetkerlerdiń kásibı jaramdylyǵyn naqty táýelsiz baǵalaýdy kóre alady, óz uıymyndaǵy eńbek ónimdiligin arttyrady jáne bilikti mamandardy ala alady. Al qyzmetkerler men jumys izdeýshiler óz daǵdylaryna sáıkes keletin laýazymdardy tezirek taýyp, tabysyn arttyra alady», – dedi ol.
