Kásiptik biliktilik jónindegi ulttyq organ qurylady

NUR-SULTAN. QazAqparat – Elimizde Kásiptik biliktilik jónindegi ulttyq organ qurylady. Bul týraly QR Eńbek jáne halyqty áleýmettik qorǵaý vıtse-mınıstri Oljas Ordabaev aıtty, dep habarlaıdy QazAqparat tilshisi.

«Ulttyq biliktilik júıesin basqarýdyń úsh deńgeıli modeli jasaldy. Birinshi deńgeı – Kásiptik biliktilik jónindegi ulttyq keńes. Ol Ulttyq biliktilik júıesiniń strategııalyq basqarýyna jaýap beretin sheshimder qabyldaýdyń biryńǵaı ortalyǵyna aınalady», - dedi ol Májiliste «Kásiptik biliktilik týraly» jáne «Qazaqstan Respýblıkasynyń keıbir zańnamalyq aktilerine kásiptik biliktilik máseleleri boıynsha ózgerister men tolyqtyrýlar engizý týraly» zań jobalaryn tanystyra kele.

Onyń atap ótýinshe, ekinshi deńgeı - memlekettik organdar janyndaǵy kásiptik biliktilikter jónindegi salalyq keńester. Olar óz salasyn kásibı bilikti kadrlarmen qamtamasyz etýge jaýap bere otyryp, salalyq biliktilik júıelerin ornatýda jetekshi ról atqaratyn bolady.

Úshinshi deńgeıde Kásiptik biliktilik jónindegi ulttyq organdy qurý kózdeledi. Onyń quzyretine Ulttyq biliktilik júıesi boıynsha ádistemelik jáne saraptamalyq qoldaý kórsetý jónindegi fýnktsııalar kiredi.