Kásiporyndarda óndiris qýatynyń júktemesi ulǵaıdy – Ulttyq bank
Banktiń habarlaýynsha, kásiporyndardy monıtorıngteý nátıjesinen naqty sektorda ekonomıkalyq belsendiliktiń birtindep qalpyna kele bastaǵanyn baıqaýǵa bolady. Bul úrdis óndiris qýatynyń júktemesi men óndiris kóleminiń ulǵaıýynan, aktıvter men aınalymdaǵy qarajattardyń tez qozǵalysynan, sondaı-aq aıyrbas baǵamynyń teris áseriniń tómendeýi esebinen boldy.
2021 jyldyń II toqsanynda kásiporyndarda óndiris qýatynyń júktemesi (ÓQJ) ulǵaıdy, ÓQJ-niń ortasha deńgeıi 53,5%-ǵa deıin (І toqsanda – 52,1%) boldy. Nátıjesinde óndiris kólemi artty. Dıffýzııalyq ındeks (budan ári – DI) ósý aımaǵynan ótip, 40,5-ten 53,8-ge deıin ósti.
Sonymen qatar naqty sektorda daıyn ónimge degen suranys kórsetkishi 51,1-den 50,2-ge deıin azdap tómendedi. Indeks taýar óndirý sektorynda (52,1-den 51,3-ke deıin), qyzmet kórsetý sektorynda (50,1-den 49,1-ge deıin), taý-ken óndirý ónerkásibinde (52,6-dan 51,8-ge deıin) jáne óńdeý ónerkásibinde
(52,5-ten 51,1-ge deıin) tómendedi.
2021 jyldyń II toqsanynda jalpy ekonomıka boıynsha kásiporyndardyń daıyn ónimine baǵanyń ósý qarqyny 59,2-den 61,5-ke deıin ósti. Óńdeý jáne taý-ken ónerkásibinde DI tıisinshe 65,3-ke jáne 61,8-ge deıin ulǵaıdy. 2021 jyldyń III toqsanynda kásiporyndar shıkizat pen materıaldar baǵasynyń ósý qarqynynyń tómendeýin kútedi.
2021 jyldyń II toqsanynda suralǵan kásiporyndardyń 17,5%-y bankke kredıt alýǵa ótinish berip, kásiporyndardyń 16,7%-y (nemese kredıt alýǵa ótinish bergenderdiń 95,4%-y) qaryz aldy. Kásiporyndardyń basym kópshiligi (84,6%) aınalym qarajatyn qarjylandyrýǵa (materıaldar, shıkizat, jartylaı daıyn ónimder jáne t.b. satyp alý) kredıt tartty.
2021 jyldyń II toqsanynda júrgizilgen saýalnama nátıjesi boıynsha, kásiporyndardyń 34,1%-y Qazaqstan ekonomıkasynyń búgingi jaı-kúıi bıznesti júrgizýge kedergi bolyp otyrǵanyn aıtqan (1-toqsanda mundaı kásiporyndardyń úlesi 33,9% boldy). Basqa negizgi kedergiler naryqtyq básekelestik (28,9%), satyp alýshylar izdeý (22,8%), salyq aýyrtpalyǵynyń deńgeıi (22,4%), bilikti mamandardyń jetispeýshiligi (18,1%), debıtorlyq bereshekti qaıtarý qıyndyǵy (12,2%) bolyp kete beredi. Mańyzdylyǵy jaǵynan qarjylandyrýǵa qoljetimdilik 8-orynda (11,9%) ornalasqan.
