Kásiporyndar 1970-1980 jyldary jasalǵan jabdyqtardy áli qoldanady - komıtet
Bul týraly Ortalyq kommýnıkatsııalar qyzmetinde ótken brıfıngide TJM Ónerkásiptik qaýipsizdik komıtetiniń tóraǵasy Nyǵmedjan Maqajanov aıtty, dep habarlaıdy QazAqparat tilshisi.
«Búgingi tańdaǵy tehnologııalyq jabdyqtyń negizgi úlesi ótken ǵasyrdyń 70-80 jyldarynan bastap qoldanylyp keledi. Ónerkásiptik qaýipsizdik salasyndaǵy zańnamada qaýipti óndiristik nysandardyń ıelerin normatıvtik qyzmet merzimin ótkergen tehnıkalyq qurylǵylardy ýaqytyly jańartýǵa mindetteıtin normalar kózdelgen. Osy maqsatta biz qadaǵalaýdaǵy kásiporyndarmen birlesip jyl saıyn Qaýipti óndiristik obektilerdi tehnıkalyq qaıta jaraqtandyrýdyń jıyntyq josparyn qalyptastyramyz. Ótken jyly qaýipti óndiristik nysandardyń ıelerimen 2 585 tehnologııalyq jabdyq aýystyryldy», - dep ótken jyldyń qorytyndysyn jarııalady komıtet basshysy.
Nyǵmedjan Maqajanov aıtýynsha, byltyr qaýipsizdik talaptaryn óreskel buzǵany úshin 733 kásiporynnyń jumysy toqtatylǵan. Buǵan qosa, kompanııalarǵa 254 mln teńge aıyppul salynǵan.
Brıfıngi barysynda komıtet basshysy ótken jyly el kásiporyndarynda 28 avarııa bolyp, saldarynan 15 adam kóz jumǵanyn málimdedi.
