Qasym-Jomart Toqaev Shavkat Mırzıeevti Aqordada qarsy aldy
ASTANA. KAZINFORM – Memleket basshysy Qasym-Jomart Toqaev Astanaǵa memlekettik saparmen kelgen Ózbekstan Prezıdenti Shavkat Mırzıeevti Aqordada qarsy aldy.
Aldymen Qasym-Jomart Toqaev pen Shavkat Mırzıeev bir-birine resmı delegatsııa múshelerin tanystyrdy. Osydan keıin mártebeli meımannyń saparyna oraı Saltanatty rásimder zalynda sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Shavkat Mırzıeev kilemshe boıymen Qazaqstan Respýblıkasynyń Memlekettik Týyna qaraı júrdi. Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń meıman men Prezıdent qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Qazirgi ýaqytta Memleket basshylary shaǵyn quramdaǵy kezdesýge ótti. Kelissózder qorytyndysynda birqatar mańyzdy qujatqa qol qoıylady dep josparlanyp otyr.
Aıta keteıik, keshe Qasym-Jomart Toqaev Qazaqstanǵa memlekettik saparmen kelgen Ózbekstan Prezıdenti Shavkat Mırzıeevti elorda áýejaıynda qarsy alǵan edi.
