Qasym-Jomart Toqaev pen Vladımır Pýtınniń kelissózi bastaldy
MÁSKEÝ. KAZINFORM – Qazaqstan Prezıdenti Qasym-Jomart Toqaev pen Reseı Prezıdenti Vladımır Pýtınniń kelissózi bastaldy, dep habarlaıdy Aqordanyń baspasóz qyzmeti.
– Árıne, Siz durys atap ótkendeı, biz birtutas memleket, birtutas saıası jáne gýmanıtarlyq keńistik jaǵdaıynda jumys isteýdi bastadyq. Degenmen, izimizden erip kele jatqan jas býynnyń jasy shamamen 30-35-te jáne olar bul birtutas memleketti kórgen joq. Bizdiń mindetimiz – men aıtqandaı, estafetany berý, ıaǵnı bir-birimiz týraly bilim men jańa tarıhı geosaıası shyndyq jaǵdaıynda yntymaqtastyqtyń barlyq baǵytyn damytýdyń asa mańyzdy ekenin túsindirý. Jastarymyz onsyz osynaý turaqsyz álemde ári qaraı ómir súrý múmkin emes ekenin túsinýi tıis. Dál osy sátte Qazaqstan Prezıdentiniń Reseı Federatsııasyna jasaǵan memlekettik sapary atalǵan mindetti edáýir dárejede oryndap otyr, - dedi kelissóz barysynda Qazaqstan Prezıdenti.
Aıta keteıik, Memleket basshysy Qasym-Jomart Toqaev Reseı Prezıdenti Vladımır Pýtınniń shaqyrýymen Máskeýge memlekettik saparmen bardy.
Memlekettik shekaradan ótken sátten Máskeý áýejaıyna qonǵanǵa deıin Reseıdiń áýe keńistiginde Qazaqstan Prezıdentiniń bortymen birge RF Qorǵanys mınıstrliginiń Sý-35 ushaqtary qaptaldasyp ushty.
Sapar barysynda Qazaqstan men Reseı prezıdentteri beıresmı kezdesý ótkizdi.
Qasym-Jomart Toqaev pen Vladımır Pýtınniń beıresmı pikiralmasýy keshki as ústinde jalǵasty.
Prezıdent «Belgisiz jaýynger beıiti» eskertkish memorıalyna gúl shoǵyn qoıyp, Reseı Federaldy Jınalysy Federatsııa keńesiniń tóraǵasymen kezdesti.
Sondaı-aq Kremlde Qasym-Jomart Toqaevty resmı qarsy alý rásimi ótkeni týraly jazdyq.