Qasym-Jomart Toqaev ózbek basshysynyń Qazaqstanǵa saparyn joǵary baǵalady

ASTANA. KAZINFORM – Ózbekstan basshysynyń bul sapary eki eldiń yntymaqtastyǵyn nyǵaıtý jolyndaǵy mańyzdy qadam. Bul týraly Aqordada Ózbekstan Prezıdenti Shavkat Mırzıeevpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty.

«Eń aldymen meniń shaqyrýymdy qabyl alyp, elimizge memlekettik saparmen kelgeni úshin Shavkat Mıromonovıch Mırzıeevke shynaıy rızashylyǵymdy bildiremin. Muny Ózbekstan basshysynyń qazaq jurtyna zor qurmetiniń belgisi dep sanaımyn. Sondaı-aq bul saparyńyzdy eki eldiń yntymaqtastyǵyn nyǵaıtý jolyndaǵy mańyzdy qadam retinde baǵalaımyn. Biz aldyńǵy jyly odaqtastyq qatynastar týraly tarıhı shartqa qol qoıdyq. Bul - sizdiń sodan bergi Qazaqstanǵa jasaǵan alǵashqy memlekettik saparyńyz. Sondyqtan men osy saparǵa aıryqsha mán berip otyrmyn. Onyń eki el úshin de mańyzy óte zor. Qazaqstan men Ózbekstan ejelden irgesi bólinbegen aǵaıyn elder. Baýrylastyǵymyzdyń tamyry tereńde jatyr. Bir-birimizge árdaıym qoldaý kórsetemiz. Maqsat-muratymyz da ortaq. Qarym-qatynasymyz sońǵy jyldary qarqyndy damyp keledi. Biz strategııalyq seriktestiakti nyǵaıta túsýge basa nazar aýdaramyz. Bul eki jaqtyń da múddesine saı keledi. Osy sapar ózara yqpaldastyqty jańa deńgeıge kóteredi dep senemin», - dedi Memleket basshysy.

Prezıdent búgin ózara qoldaý jáne senim rýhynda nátıjeli kezissózder júrgizilgenin basa aıtty.

«Qarym-qatynasymyzdy jandandyrýǵa múddeli ekenimizdi taǵy da atap óttik. Sondaı-aq strategııalyq áriptestikti jáne odaqtastyqty damytý baǵdarlamasyn qabyldadyq. Bul qujat aldaǵy 10 jylǵa arnalǵan. Basty maqsat – dostyǵymyzdy arttyryp, san túrli saladaǵy tıimdi baılanysty damytýǵa tyń serpin berý», - dedi Qasym-Jomart Toqaev.