Qasym-Jomart Toqaev Qatar Ámirimen kezdesti
ASTANA. KAZINFORM — Prezıdent Qasym-Jomart Toqaev ShYU sammıtine qatysýǵa arnaıy kelgeni jáne Qazaqstannyń halyqaralyq bastamalaryn qoldaǵany úshin Qatar Memleketiniń Ámiri sheıh Támım ben Hamad Ál Tánıge alǵys aıtty.
Memleket basshysy Qatardy Qazaqstannyń eń jaqyn seriktesteriniń biri retinde atap ótip, eki eldiń maqsattary ortaq jáne tileýles ekenin aıtty.
— Sizdiń elińizben tyǵyz qarym-qatynas jasaýǵa nıetti ekenimizdi atap ótkim keledi. Meniń Dohaǵa jasaǵan saparym týraly jaqsy estelikter qaldy. Bul ekijaqty yntymaqtastyqty damytýǵa tyń serpin berý turǵysynan aıtýly oqıǵa boldy. Biz baılanystarymyzdy strategııalyq seriktestik deńgeıine kóterdik. Meniń saparym barysynda óte mańyzdy qujattarǵa qol qoıyldy. Qazaqstan Úkimeti osy kelisimderdiń tabysty júzege asyrylýy úshin qoldan kelgenniń bárin jasaıdy dep oılaımyn, — dedi Prezıdent.
Sheıh Támım ben Hamad Ál Tánı Astanaǵa taǵy da kelip, ShYU sammıtine qatysý zor mártebe ekenin aıtty.
— Árıne, Dohaǵa jasaǵan óte mańyzdy saparyńyz esimde. Siz ózara qarym-qatynasymyzdy strategııalyq deńgeıge kótergenimizdi eske saldyńyz. Men qarym-qatynasymyzdy maqtan tutamyn. Elderimiz áli de aýqymdy jumys atqarýǵa, sonyń ishinde ekonomıkalyq jáne ınvestıtsııalyq baılanysty odan ári nyǵaıtýǵa tıis, — dedi Qatar Ámiri.
Áńgime barysynda taraptar saýda-ekonomıkalyq, mádenı-gýmanıtarlyq, kólik-logıstıkalyq, sondaı-aq aýyl sharýashylyǵy, energetıka, bilim berý, densaýlyq saqtaý jáne telekommýnıkatsııa salalaryndaǵy ekijaqty baılanysty nyǵaıtý perspektıvalaryn talqylady.
Óńirlik jáne halyqaralyq kún tártibindegi ózekti máselelerge erekshe nazar aýdaryldy.
