Qasym-Jomart Toqaev elimiz tańdaǵan baǵyttyń keıbir tustary Qatarmen uqsas ekenin aıtty
DOHA. KAZINFORM – Qasym-Jomart Toqaev qazaq-qatar ınvestıtsııalyq dóńgelek ústeline elimiz tańdaǵan baǵyttyń keıbir tustary Qatarmen uqsas ekenin aıtty, dep habarlady Aqordanyń baspasóz qyzmeti.
Qazaqstannyń ashyq esik saıasatyna, orasan zor resýrsyna jáne erkin naryqqa qatysty reformalaryna sheteldiń, sonyń ishinde Qatardyń kóptegen kompanııasy nazar aýdardy. Ártaraptandyrylǵan jáne ornyqty ekonomıkanyń negizin qalaý – Qazaqstannyń basty mindeti.
– Men jańa ekonomıkalyq baǵytty usyndym. Atalǵan bastama anaǵurlym qýatty ári qarqyndy damyǵan el qurý maqsatynda qurylymdyq reformalardy júzege asyrýǵa baǵyttalǵan. Bul – órshil, biraq oryndalatyn mindet. Byltyr Qazaqstannyń jalpy ishki ónimi 265 mıllıard dollardy qurady. Bizdiń endigi maqsatymyz – osy kórsetkishti 2029 jylǵa qaraı 450 mıllıard dollarǵa jetkizý. Ótken jyly ekonomıkalyq ósim 5,1 paıyzǵa jetti. Bul álemdik ekonomıkanyń boljamdy damý qarqynynan shamamen eki ese kóp. Biz ortamerzimdi perspektıvada ekonomıkanyń ósimin keminde 6 paıyz deńgeıinde ustap turýdy josparlap otyrmyz. 2022 jyly shetelden 28 mıllıard dollar kóleminde tikeleı ınvestıtsııa tarttyq. Al syrtqy saýda aınalymy 136 mıllıard dollarǵa jetti. Qazaqstan Ortalyq Azııada tikeleı sheteldik ınvestıtsııa keletin negizgi el bolyp qalýy úshin eń joǵary álemdik standarttarǵa saı jańa ınvestıtsııalyq tsıkldy iske qostyq, – dedi Prezıdent.
Qasym-Jomart Toqaev jıynǵa qatysýshylardyń basym bóligi qazaq-qatar ekonomıkalyq qatynastarynyń tabysty damýyna óz úlesin qosatynyna senim bildirdi.
Memleket óz tarapynan salyq jáne keden jeńildikterin usynýǵa, jobalardy birlese qarjylandyrýǵa, ishinara kepildik berýge jáne eksportty qoldaý tetikterin iske qosýǵa daıyn.
– Jýyrda biz Investıtsııalyq keńes qurdyq. Oǵan Premer-Mınıstrdiń birinshi orynbasary tóraǵalyq etedi. Keńes shuǵyl sheshim qabyldaý jáne jan-jaqty memlekettik qoldaý arqyly ınvestıtsııalyq jobalardyń júzege asyrylýyna yqpal jasaıdy. Qatar kompanııalaryn bıznes júrgizý úshin tyń múmkindikterdi qarastyryp, Qazaqstan naryǵyna ınvestıtsııa salýǵa shaqyramyz, – dedi Prezıdent.
Memleket basshysy seriktestikke tyń serpin berý úshin joǵary deńgeıdegi Qazaq-qatar birlesken komıssııasynyń jáne Іskerlik keńestiń jumysyn jandandyrýdy usyndy Qazaqstan tarapy jaqynda ratıfıkatsııalanǵan Investıtsııalardy ózara kótermeleý jáne qorǵaý týraly kelisimniń eki el arasyndaǵy ınvestıtsııalyq yntymaqtastyqty nyǵaıta túsetinine senim bildiredi.
– Búgin Joǵary Mártebeli sheıh Támım ben Hamad Ál Tánımen kezdesý barysynda men alǵashqy qadam retinde ekijaqty saýda kólemin jarty mıllıard dollarǵa deıin ulǵaıtýdy usyndym. Biz Qatar naryǵyna mashınalar, temir, bolat, aýyl sharýashylyǵy ónimderi jáne basqa da joǵary sapaly taýarlardy jetkize alamyz. Sonymen qatar Qazaqstan JІÓ kólemi 2,6 trıllıon dollar bolatyn Eýrazııalyq ekonomıkalyq odaq naryǵyna jol asha alady. Biz Qytaımen shekaralas elmiz. Bul «Bir beldeý, bir jol» jobasy aıasynda saýda-sattyq júrgizýge jaqsy múmkindik,– dedi Memleket basshysy.
Prezıdenttiń aıtýynsha, búginde vızasyz rejım men apta saıyn ushatyn 20-ǵa jýyq tikeleı reıstiń arqasynda Qazaqstan men Qatar baılanystary burynǵydan da nyǵaıa tústi. Buǵan qosa, elimiz óziniń kólik-logıstıkalyq áleýetin ártaraptandyrýmen jáne keńeıtýmen belsendi túrde aınalysyp jatyr.
– Kaspıı teńizindegi eń iri habtardyń biri sanalatyn Aqtaý porty, Astana jáne Almaty halyqaralyq áýejaılary, qarqyndy damyp kele jatqan kóptegen temirjol jáne avtomobıl joldary, sondaı-aq joǵary sapaly logıstıka toraptary men habtar iri ınfraqurylymdyq jobalarymyzdyń qataryna kiredi. Biz Transkaspıı halyqaralyq kólik baǵytynan nemese Orta dálizdiń damýynan zor úmit kútemiz. Qatar kompanııalary men qarjy ınstıtýttary osy saladaǵy bıznes pen ınvestıtsııa múmkindikterin qarastyrý arqyly qomaqty paıda tabady dep sanaımyz. Búgin biz jalpy ınvestıtsııalyq quny 18 mıllıard dollarǵa jýyq túrli kommertsııalyq qujattarǵa qol qoıamyz. Bul ekonomıkalyq yntymaqtastyqty damytýǵa batyl kiriskenimizdi kórsetedi, – dedi Memleket basshysy.
