Qasym-Jomart Toqaev: Eldiń erteńi muǵalimderge tikeleı baılanysty

ASTANA. KAZINFORM – Muǵalimder memlekettik mańyzy bar jumysty atqaryp jatyr. Bul týraly elordada ótip jatqan ustazdardyń respýblıkalyq tamyz konferentsııasynda Memleket basshysy Qasym-Jomart Toqaev aıtty.

- Eń aldymen, barshańyzǵa dástúrli Tamyz konferentsııasynyń ashylýy qutty bolsyn! Bul – óskeleń urpaqqa sapaly bilim men taǵylymdy tárbıe berý máselesine arnalǵan óte mańyzdy basqosý. Ustaz – ulttyń shamshyraǵy. Sizder kúndelikti qajyrly eńbekterińiz arqyly el damýyna ólsheýsiz úles qosyp kelesizder. Jas urpaqtyń boıyna bilim nárin seýip, ozyq oıly ult tárbıelep júrsizder. Halqymyzdyń zııatkerlik qýatyn arttyrýǵa belsene atsalysyp jatsyzdar. Búgin men elimizdegi ustazdar qaýymyna shynaıy rızashylyǵymdy bildiremin!, - dedi Prezıdent.

Memleket basshysy shyn máninde muǵalimder memlekettik mańyzy bar jumysty atqaryp jatqanyn basa aıtty.

- Ybyraı Altynsarın «Jaqsy oqytýshyny bárinen de qymbat kóremin» degen. Eldiń erteńi muǵalimderge tikeleı baılanysty. Sondyqtan ustazdyń qoǵamdaǵy orny bárinen bıik bolýǵa tıis, - dedi Qasym-Jomart Toqaev.

Aıta keteıik, Qasym-Jomart Toqaevtyń qatysýymen ustazdardyń tamyz konferentsııasy bastalǵanyn jazǵanbyz.