«Qasıetti tazalyq»: Muhtar Áýezovtiń týǵan jerinde senbilik ótti
SEMEI. KAZINFORM – Memkeleket kóleminde ótip jatqan respýblıkalyq «Taza Qazaqstan» ekologııalyq aktsııasyna Abaı aýdany halqy da belsendi qatysyp jatyr.
Aýdan kóleminde tazalyq jumystary, abattandyrý, kórkeıtý sharalary qatar júrgizilip jatyr. Kıeli mekenimizdegi tarıhı-mádenı oryndar, eskertkishter men keseneler aýmaǵy tazartylyp, abattandyryldy.
22 sáýirde Qaraýyl aýylynda «Aýyl – el besigi» baǵdarlamasy aıasynda joldardy asfalttaý jáne jaryqtandyrý jumystary bastaldy.
«Qaraýyl aýylynda Mamaı kóshesi men Toqtamys kóshesin asfalttaý jumystary bastaldy. Bul jumys mamyr aıynyń sońyna deıin aıaqtalady dep josparlanyp otyr. Sonymen qatar Toqtamys kóshesinde 73 jaryq shamyn ornatýdy kózdep otyrmyz, mamyr aıynyń sońyna deıin jumystar aıaqtalady», - deıdi Qaraýyl aýyldyq okrýginiń ákimi Erik Dúısenbekov.
Sonymen qatar Muhtar Áýezovtiń týǵan jerindegi «Bórili» murajaıynyń aýmaǵynda da senbilik ótti. Qasqabulaq aýyldyq okrýginiń turǵyndary, belsendi jastar men murajaı qyzmetkerleri tazalyq jumystaryn júrgizip, aǵashtardy áktedi.
«Respýblıkalyq «Taza Qazaqstan» aktsııasy aıasynda apta saıyn túrli is-sharalar uıymdastyrylyp jatyr. Tarıhı jáne kıeli oryndar abattandyrylyp, qoqystan tazartyldy. Aýdan turǵyndaryna, aýqymdy iske uıymshyldyqpen qatysqan qoǵam belsendilerine alǵysymdy bildiremin. Aldaǵy senbilikterde de osylaı bereke-birligimizdi kórseteıik», - deıdi aýdan turǵyny Qusman Berleshov.
