«Kásibı armııa - el qorǵany» - baspasózge sholý
***
«Egemen Qazaqstan» basylymynyń jazýynsha, keshe, Otan qorǵaýshylar kúni qarsańynda Memleket basshysy Nursultan Nazarbaevtyń Jarlyǵymen áskerı jáne qyzmettik boryshyn atqarý kezinde batyldyq pen janqııarlyq kórsetken bir top áskerı qyzmetshiler, quqyq qorǵaý jáne ulttyq qaýipsizdik organdary qyzmetkerleri Qazaqstan Respýblıkasynyń memlekettik nagradalarymen marapattaldy. Nagradalardy tapsyrý saltanatyna Prezıdent ózi qatysty. Saltanatty rásim kezinde Elbasy: «Búgin elimizdiń Qarýly Kúshteriniń memlekettik merekesi qarsańynda Memleket basshysy, Qarýly Kúshterdiń Joǵarǵy Bas qolbasshysy retinde men sizderdi joǵary memlekettik nagradalarmen marapattaýǵa shaqyryp otyrmyn. Bul - memlekettiń Otan aldyndaǵy minsiz qyzmetterińizdi baǵalaǵany. Bizdiń halqymyz beınettiń de zeıneti bar deıdi. Sizderdiń eńbekterińiz jandy. Memleket mine, sol qajyrly eńbekterińizdi baǵalap otyr. Ózderińizge ordender men medaldar tapsyrý arqyly memleket sizderge óziniń rızashylyǵyn jáne baǵasyn beredi. Árıne, sizder tek qana marapat úshin qyzmet etpeıtinderińizdi bilemiz. Degenmen, eńbekterińiz elený kerek. Sizder eldiń táýelsizdigin, azamattardyń beıbit ómiri men tynyshtyǵyn qorǵap júrsizder», - dedi. Tolyǵyraq «Otan qorǵaý - qasıetti borysh» atty maqaladan oqı alasyzdar.
«Egemen Qazaqstan» gazetiniń búgingi sanynda Qazaqstan Respýblıkasy Qorǵanys mınıstriniń birinshi orynbasary - respýblıka Qarýly Kúshteri Bas shtabynyń bastyǵy, general-polkovnık Sáken Jasuzaqovpen aradaǵy suhbatty jarııalady. «Árıne, oń úrdis qalyptasyp otyr. Basqasha bolýy múmkin de emes. Óıtkeni, eń aldymen, jas jigitti merzimdi jaýyngerlik qyzmetke shaqyrýdyń aldynda biz kózdegen maqsatymyzǵa sáıkes úlken jumys júrgizemiz. Ásker qataryna shaqyrylýshylarmen jáne olardyń ata-analarymen áńgimelesip, olardyń adamgershilik, iskerlik qasıetteri, densaýlyq jaǵdaıy, dene damýy, bilimi men arnaýly daıarlyǵy, otbasylyq jaǵdaıy týraly málimetter naqtylanady. Tek osy jumystardyń qorytyndysy boıynsha ǵana ásker qataryna shaqyrylýshylardy qaı ásker túrine, tegine jiberý týraly sheshim qabyldanady. Búgin bizde ásker qataryna shaqyrylýshylar arasynan eń úzdikterin iriktep alý múmkindigi bar. Qarýly Kúshterge dene daıarlyǵy, moraldyq-psıhologııalyq ázirligi joǵary, tıisti bilimi men mamandyǵy bar jastar kelýde», - deıdi Sáken Jasuzaqov. Bul suhbat « Kásibı armııa - el qorǵany» degen taqyryppen berilgen.
***
«Jas qazaq» basylymy erejesiz jekpe-jekten top jarǵan Jumabek Tursynmen aradaǵy suhbatty kópshilik nazaryna usynyp otyr. «Qazaq eline Jumabek Tursyn keldi» degen aqjoltaı jańalyq halyq arasynda tez tarap ketti. Erejesiz jekpe-jekten Qytaıda bet qaratpaı, mıllıardtyń ishinde top jarǵan jigit. Amerıkadaǵy UFC dodasyna jol salǵan tuńǵysh qazaq ta sol Jumabek. Batyrdy kórýge biz de asyqtyq. «Álem faıters» klýbynda jattyǵyp júrgen ol áńgimeni atamekenge degen saǵynyshtan bastady», - dep jazady gazet «Jaýynger» degen taqyryppen bergen suhbatynda. Jumabek Tursyn: Iá, talaı jyl boıy kókiregimde turǵan toń jibidi. Shekaradan ótken boıda, denem jeńildep qaldy. Rýhym kóterildi. Bótenniń emes, ózimniń jerimdi basyp turǵanyma qýandym. Atamekenge at izin saldym, eldiń dámi buıyrdy. Budan artyq ne kerek?! Qazaqstanǵa kelýdi 20 jyl boıy armandap edim. Shúkir, bul kúnge de jettim.
***
«Eksperss-K» basylymynyń búgingi sanynda « Týrtsııa stroıt stený na granıtse s Sırıeı» atty materıal jaryq kórdi. Sırııadan zańsyz kóshi-qon men kontrabandany toqtatý úshin ońtústik-shyǵys shekaranyń ýchaskesi boıymen Túrkııa segiz shaqyrymdyq qorǵannyń qurylysyn bastady. Sonymen qatar bul qabyrǵa shekaralas aımaqtarda ekstremısterdiń júris-turysyn qıyndatady dep kútilýde.
***
«Egemen Qazaqstan» basylymynda ınvestıtsııa máselesin arqaý etken «Qarjy tartýdyń tóte joly» atty kólemdi maqala berilgen. Investıtsııalyq saıasatqa keler bolsaq, ol - búginde eldiń ekonomıkalyq damýyndaǵy, onyń ishinde «Qazaqstan-2050» Strategııasynda atap ótilgen ónerkásipti damytý isindegi Úkimettiń eń sheshýshi mindetteriniń biri. Búkil álemde oryn alǵan daǵdarysqa baılanysty damýshy elderden kapıtaldyń keri qaıtýy oryn alyp otyrǵan jaǵdaıda bul ońaı jumys emes. Máselen, 2007 jyly tikeleı shetel ınvestıtsııalarynyń jalpy jahandyq aǵyny 2 trıllıon AQSh dollaryn qurasa, 2012 jyly onyń deńgeıi 1,3 trıllıon AQSh dollary kóleminde belgilendi.Sońǵy jyldary jahandyq jobalardyń 22 paıyzdan astamyna tikeleı shetel ınvestıtsııalaryn tartqan BRIK elderiniń úlesi 17,6 paıyzǵa deıin tómendedi. Tikeleı shetel ınvestıtsııalary jobalarynyń sany Qytaı men Reseıde 2012 jyly sońǵy onjyldyqtar ishindegi eń tómengi deńgeıde boldy. Qazaqstanǵa 2005 jyldan 184 mıllıard AQSh dollarynan astam jalpy sheteldik tikeleı ınvestıtsııalar tartyldy, bul búkil sheteldik tikeleı ınvestıtsııalardyń 55 paıyzyn (102 mlrd. AQSh dollary) quraıdy.
