«Qashý» túrikshe sóıledi

ASTANA. QazAqparat - Jýyrda Túrkııa astanasy Ankara qalasynda Qazaqstan men Túrkııa arasyndaǵy dıplomatııalyq qarym-qatynastyń 25 jyldyǵy aıasynda Eýrazııa Jazýshylar qaýymdastyǵynyń shtab-páterinde qazaqtyń kórnekti jazýshysy Rollan Seısenbaevtyń túrik tiline aýdarylǵan «Qashý» atty povesiniń tusaýkeser rásimi ótti.

Atalǵan is-sharaǵa Qazaqstan­nyń Túrkııadaǵy Elshiliginiń dıplomaty Málik Otarbaev, Eýrazııa Jazýshylar qaýymdastyǵynyń tóraǵasy ıAkýb Omaroǵly, «Kardesh kalemler» jýrnaly bas redaktorynyń orynbasary Osman Chevıksoı, ádebıettanýshy-ǵalym Jámılıa Kynadjy, aýdarmashy Arıf Ajaloǵly, túriktiń belgili qalamgerleri Atalaı ıAǵmýr, Nazmı Shımshek, Tanjý Kara, Alper Shenadam jáne taǵy basqa zııaly qaýym ókilderi qatysty.

Jıynda sóz sóılegen Eýrazııa Jazýshylar odaǵynyń tóraǵasy ıA.Omaroǵly Qazaqstan men Túrkııa arasyndaǵy mádenı-gýmanıtarlyq qarym-qatynastyń qarqyndy damyp otyrǵandyǵyn jetkizdi. Elbasy N.Nazarbaevtyń «Bolashaqqa baǵdar: rýhanı jańǵyrý» atty maqalasyna arqaý bolǵan rýhanııat pen mádenıettiń jańarý máselesiniń óte oryndy kóterilgendigin, maqaladaǵy usynystardyń tek Qazaq­stanǵa ǵana emes, túrkitildes elderge de qajetti ekendigin aıtty. Sonyń bir dáleli retinde tusaýy kesilgen «Qashý» atty povesiniń jaryq kórýi dep kórsetti. Sonymen qatar ıA.Omaroǵly «Qashý» atty kitaptyń romannyń júgin kóteretindigin jetkizip, kitapty qazaq romandary serııasymen basyp shyǵarǵandyǵyn ­habardar etti.

Jazýshy O.Chevıksoı R.Seısenbaev­tyń shyǵarmalarynan qazaq dalasynyń ıisi ańqıtyndyǵyn jetkizse, qalamgerler A.ıAǵmýr men N.Shımshek kórnekti jazýshyny quttyqtap, júrekjardy tilekterin jetkizdi. Kitapty túrik tiline aýdarǵan - fılologııa ǵylymynyń doktory, aýdarmashy A.Ajaloǵly.

Derekkóz: «Ana tili» gazeti (avtory - Baǵdagúl Balaýbaeva)