KASE-niń Máskeý bırjasyna tıesili úlesin kim satyp alady
ASTANA. KAZINFORM – Qazaqstan qor bırjasynyń basqarma tóraıymy Alına Aldambergen Máskeý bırjasynyń (MOEX) sanktsııaǵa ilinýi Qazaqstannyń valıýta naryǵyna qandaı qater tóndirip otyrǵanyn aıtty.
«Qazaqstan qor bırjasy qazaqstandyq ózge de kompanııalar men bankter tap keletin jaǵdaımen jolyǵyp otyr dep oılaımyn. Kontragentterimizdiń biri sanktsııaǵa túsken. Máskeý bırjasy bizdiń aktsıonerlerdiń biri bolyp esepteledi – 13,1 paıyz aktsııaǵa ıelik etip otyr. Strategııalyq seriktesimiz bolyp sanalady – birqatar kelisimderge qol qoıylǵan. Biraq sonyń ózinde sanktsııalarǵa baılanysty Máskeý bırjasymen aradaǵy qarym-qatynasqa Qazaqstan qor bırjasy men KASE klırıng ortalyǵyna kelýi múmkin qaýip-qater turǵysynan taldaý júrgizilip jatyr. Osyǵan baılanysty bırjany basqarý organdary sarapshylardy shaqyryp, keńesin alyp, máseleni qarap jatqanyn habarlaǵanbyz. Biz bırjanyń aktsıonerleriniń arasynda sanktsııaǵa túsken tulǵanyń bolýy bizdiń halyqaralyq qarjy uıymdarymen baılanysymyzǵa áser etedi dep esepteımiz», - dedi ol baspasóz máslıhatynda.
Degenmen Alına Aldambergen aradaǵy kelissózdiń mán-jaıyn ashyp aıtpady.
«Bul jerde biz dollar-teńge, eýro-teńge, ıýan-teńge jubymen sheteldik valıýta saýdasyn uıymdastyratyn kontragent ekenimizdi atap ótý qajet. Sáıkesinshe, biz de sanktsııa taldaýynan ótip turamyz. Sanktsııaǵa ilingen tulǵanyń aktsıonerler tiziminde bolýy bırjaǵa qyzmet kórsetýdi toqtatý nemese jekelegen tólemderdi toqtatý turǵysynan qater tóndiredi. Óıtkeni biz Qazaqstannyń valıýta naryǵyndaǵy ortalyq býyn bolyp eseptelemiz. Bırjada mundaıǵa jol berýge bolmaıdy. Osyǵan baılanysty Máskeý bırjasynyń Qazaqstan qor bırjasynyń kapıtalyndaǵy úlesin toqtatý kerek. Biz kelissóz júrgizip, josparlap jatqanymyzdy aıttyq. Aktsııalardy ne KASE-niń ózi, ne úshinshi bir tulǵa Qazaqtan qor bırjasynyń maquldaýymen satyp alýy múmkin. Óıtkeni Máskeý bırjasynyń úlesi aıtarlyqtaı eleýli. Qaıtken kúnde de Qazaqstan qor bırjasy eldegi kapıtal naryǵynyń turaqty jumys isteýine qajetti sharanyń bárin jasaıdy. Kelissózderdiń barysy qyzyǵýshylyq týǵyzyp jatqanyn túsinemin. Biraq kez kelgen kelissóz qupııa júrgiziletinin túsinetin shyǵarsyzdar. ıAǵnı, kelissóz nátıjesi keıin habarlanady nemese naqty bir áreketterden kóresizder», - dedi Qazaqstan qor bırjasynyń basqarma tóraıymy.
